33.7 тэрбум төгрөгийн хохирлыг нөхөн төлүүлжээ

Прокурорын байгууллагаас 2024 онд хийж хэрэгжүүлсэн ажил, олны анхаарал тат­­­сан за­рим хэргийн шийдвэрлэлтийн та­лаар өчиг­дөр сэтгүүлчдэд мэдээллээ. Про­ку­рор хуу­лиар хүлээсэн төр, нийтийн ашиг со­нирх­лыг хам­гаалах чиг үүргийн хү­рээнд 64 тэрбум төг­рөгийн үнийн дүн бү­хий 1973 ир­гэний хэрэг хянан шийдвэрлэх ажил­ла­гаанд оролцжээ. Ту­хайлбал, төрийн ал­бан хааг­чийг хууль бусаар то­милсон, чөлөөл­сөн, түр чөлөөлсөн, халсны улмаас төрд уч­руул­сан 206.6, гэмт хэрэг, зөрчлийн ул­маас төр, нийтийн ашиг со­нирхолд учир­сан 330.3, Эрүүл мэндийн даат­галын санд учир­сан 603.4 сая, Засгийн газрын тусгай сан­гуудаас ол­го­сон 2.5, тат­вар, нийгмийн даат­галын шимт­гэлийн өр төл­бөртэй холбоотой 28.4 тэр­бум төгрөгийн хо­хирол, төлбөрийг гар­гуу­лах иргэний хэрэг хянан шийдвэрлэх ажил­­лагаанд оролц­сон аж. Үүнээс төр, ний­тийн ашиг со­нирхолд учир­сан 33.7 тэрбум төг­­рөгийн хо­хирлыг нөхөн тө­лүү­лэх арга хэм­­жээ авчээ. Тод­руулбал, Ир­гэний ни­сэ­хийн ерөн­хий газ­рын хүсэлтээр гэ­рээний үүр­­­гийн гүйцэт­гэл­­тэй холбоотой 411.1 сая, Нийг­­­­мийн даат­га­лын газрын хү­сэлтээр нийг­­­­мийн даатгалын шимтгэл, ал­данги гар­гуу­­лах­­тай хол­боотой шүүх ху­ралд орол­цон 26.6 тэр­бум төг­рөгийг төрд ол­гуу­лахаар бол­сон байна. 
Тэгвэл өнгөрөгч онд гэмт хэргийн улмаас бусдад 3.7 их наяд төгрөгийн эд хөрөнгийн хо­хирол учирсны 1.7 их наяд буюу 46 хувийг нь мөрдөн шалгах ажиллагааны явцад нөхөн тө­лүүлэх арга хэмжээ авчээ. Өөрөөр хэлбэл, гэмт хэрэг үйлдсэн хүнээр хохирол нөхөн тө­лүүлэх, хөрөнгө орлого хураах албадлагын арга хэмжээг хэрэгжүүлэх зорилгоор мөр­­дөн шалгах ажиллагааны явцад 157.5 тэр­бум төгрөгийн үл хөдлөх хөрөнгө, тээв­рийн хэрэгслийн бүртгэл, банк, бусад сан­хүү­гийн байгууллагад байгаа мөн­­гөн хөрөн­гийн гүйл­гээний шилжилт хөдөл­гөө­нийг про­ку­рор хяз­гаарласан байна. Мөн 304 тэрбум төг­­­рө­гийн эд хөрөнгийг битүүмжлэх зөв­шөөр­­­лийг мөрдөгчид олгож, хөрөнгө хам­гаа­­лах арга хэмжээ авсан гэнэ.
2024 онд авлига, албан тушаалын 1742 хэ­рэг бүртгэлт, мөрдөн байцаалтын хэ­рэгт про­курор хяналт тавьсан бөгөөд өм­нөх оны мөн үеийнх­тэй харьцуулбал энэ төр­лийн гэмт хэрэг 4.9 хувиар өсжээ. Үүнээс 306 хэрэгт яллах дүгнэлт үйлдэн шүү­хэд шил­жүүлж шийдвэрлэсэн байна. Тод­руул­бал, эрх мэдэл, албан тушаалын байдлаа урвуулан ашигласан 197, хахууль авч, өгсөн 128, үндэслэлгүйгээр хөрөнгөжсөн найм, төс­­вийн хөрөнгийг зо­риулалтын бусаар зар­цуулсан гурван хэргийг шүүхэд шил­жүүл­жээ. Хууль бусаар олсон хө­рөнгө орлогыг хураах зорилгоор гэмт хэрэгт холбогдсон хүн, хуулийн этгээдийн 3.1 тэрбум төг­рө­гийн эд хөрөнгийг мөрдөн шалгах ажил­ла­гаа­ны явцад битүүмжилж, 85.9 тэрбум төг­рөгийн эд хөрөнгө хураан авчээ. Авлига, ал­бан тушаалын гэмт хэргийн 66.6 хувь нь нийслэлд, 33.4 нь орон нутагт гарсан байна. Улс төрд нөлөө бүхий болон нийтийн албан ту­шаал­тан эрх мэдэл, албан тушаалын байд­лаа урвуулсан нь нийт авлига, албан ту­шаа­лын хэр­гийн 78 хувийг эзэлжээ.