“Sun” пикчерс, “Red point” студи хамтран өсвөр насны охид, хөвгүүдэд тохиолдох гэнэтийн, ид шидийн явдлаар дүүрэн, инээдмийн бүрэн хэмжээний уран сайхны кино бүтээжээ. “Soulmate” нэртэй уг киноны үйл явдал ахлах сургуулийн сурагчид төгсөлтийн баяраараа жүжиг тоглох болсноор эхэлнэ. Жүжгийн гол дүрийн хоёр сурагчийн сүнс ид шидээр солигдох аж. Улмаар сүнс нь солигдсоноос болж тэд шинэ бие, орчин, шинэ ертөнцтэй нүүр тулна. Бээгий охидын ертөнцөд, Зулаа хөвгүүдийн орчинд орсноор сонирхолтой сорилтуудтай нүүр тулах аж. Тус киноны зохиолыг Г.Хишигбүрэн, Г.Гүенбаатар нар бичиж, Ц.Хүрэлбаатар найруулжээ. Гол дүрүүдэд реппер Doid буюу Б.Доржнанжид, Б.Үжин, Б.Баярцэцэг, Ү.Ундрал, Э.Төрбат, Э.Болд-Эрдэнэ, С.Идэржавхлан нар тоглосон байна. “Soulmate” киног энэ сарын 25-наас кинотеатруудаар үзэгчдэд хүргэнэ.
Бэлтгэсэн А.Хангай
