Орчин цагийн зэвсэгт хүчин байгуулагдсаны 101 жил, Монгол цэргийн өдрийг тохиолдуулан Монгол цэргийн музейгээс цуврал арга хэмжээ зохион байгуулж байна. Тодруулбал, “Монгол цэрэг-Энхийн цэрэг”, “Урлагийн бүтээлд монгол цэргийн түүх” хамтарсан үзэсгэлэнг Цэргийн дуу бүжгийн эрдмийн чуулгын байранд дэлгэсэн. Мөн Монгол цэргийн музейн үзэсгэлэнгийн танхимд цэргийн техникийн загварын болон “Уран барималчийн урланд монгол цэргийн түүх” үзэсгэлэнг энэ сарын 20 хүртэл толилуулна. Монгол цэргийн музей, “Mongolian plastic scale modelers” групп, Орос машины модель сонирхогчдын групп, “ВТ модель” дэлгүүрийн хамтарсан цэргийн техникийн хамтарсан үзэсгэлэнд нийт 500 гаруй бүтээл дэлгэжээ. Тэгвэл “Уран барималчийн урланд монгол цэргийн түүх” үзэсгэлэнгээс С.Сүх-Одын зэвсэгт хүчний түүхэнд холбогдох үйл явдал, цэргийн нэрт жанжид, удирдагч нарын хөрөг баримал, релефь бүхий 15 нэр, төрлийн 90 гаруй бүтээлийг үзэх боломжтой.
Бэлтгэсэн А.Хангай
