Улсын дээд шүүхийн нийт шүүгчийн хуралдаан 2021 оны есдүгээр сарын 20-ны өдөр хуралдлаа. Монгол Улсын дээд шүүхийн нийт шүүгчийн хуралдаанаар "Үндсэн хуулиас бусад хуулийн албан ёсны тайлбар гаргах асуудлыг хэлэлцэх" дэгийг тусгайлан тогтоож, Нийт шүүгчийн хуралдааны дэгд нэмэлт, өөрчлөлт оруулах асуудлыг хэлэлцэн батлав. Мөн Нийт шүүгчийн хуралдаанаас олонхын санал авсан Дашбалбарын Гангабаатарыг Үндсэн хуулийн цэцийн гишүүнд нэрийг нь дэвшүүлж, Монгол Улсын Их Хуралд санал болгохоор тогтжээ.
Нэр дэвшигч өмнө нь Үндсэн хууль, шүүхийн шинэчлэлийн талаар цөөнгүй судалгаа хийсэн, энэ талаарх мэдээллээ олон нийттэй хуваалцсаар ирсэн билээ.
УИХ-"ын гишүүн Б.Энхбаяр энэ талаар "Шүүхийн шинэчлэлийн амин сүнс нь шүүх дэх улс төрийн нөлөөллийг устгах, шүүхийн дотоод дахь “дарга” хэв шинжийг арилгах, дотоод ардчилалыг дэмжих замаар өөрөө өөрийгөө хянах, шүүрдэх боломжийг олгоход чиглэсэн. Нөлөөлөл устаагүй бол ийм хүн тэндээс гарч чадахгүй. Эхний үр дүн" хэмээн нэр дэвшигчийг дэмжсэн байр суурь илэрхийлжээ.
Түүнчлэн “Ардын чуулган” нам үүсгэн байгуулсныг бүртгүүлэх тухай хүсэлтийг хэлэлцээд Улс төрийн намын тухай хуульд заасан шаардлагыг хангаагүй тул улсын бүртгэлд бүртгэхээс татгалзсан байна. Хуралдаанаар Шүүхийн тухай хуулийн шинэчилсэн найруулгын нэг гол зохицуулалт болох Шүүхийн шийдвэрийг боловсруулах аргачлал, журмыг хэлэлцэн батлав.
