Улаанбаатар хотын Захирагчийн ажлын албанаас НҮБ-ын Аж үйлдвэрийн хөгжлийн газартай хамтран хэрэгжүүлж буй анхны төсөл болох “Хог хаягдлын ил шаталтыг бууруулах” бүсийн төслийг 2017 оноос эхлэн хэрэгжүүлж эхэлсэн байдаг.
Уг төслийн хүрээнд Улаанбаатар хотын Цагаан давааны төвлөрсөн хогын цэгт орчин үеийн шаардлага технологид нийцсэн байгальд хоргүй, эрүүл ахуйн шаардлага хангасан гэр хорооллын айл өрхөөс гарах үнс хүлээн авах ландфил барихаар төлөвлөөд байгаа юм.
НҮБ-ын Аж үйлдвэрийн хөгжлийн газрын төсөл хариуцсан захирал Кармела Сентена уг ажлын хүрээнд хийгдэж буй зураг төслийг бэлэн болгон Хотын Ерөнхий менежерт танилцуулж цаашид шаардлагатай тоног төхөөрөмж, машин техник зэрэг асуудлаар хэрхэн хамтарч ажиллах талаар санал солилцжээ. Энэ жил нийслэлийн төсвийн хөрөнгөөр Цагаан давааны төвлөрсөн хогийн цэгийг тойруулан тусгаарлах хашаа барихаар бэлтгэл ажил хангагдаж байна.
НҮБ-ын Аж үйлдвэрийн хөгжлийн газрын төсөл хариуцсан захирал Кармела Сентена уулзалтын үеэр хэлэхдээ “Монгол Улс бол их онцлогтой хот. Эрс тэрс уур амьсгалтайн дээр хуурайшилтын улиралд төвлөрсөн хогийн цэгүүдэд гал их гарч үүнээс үүдэн удаан задардаг органик бохирдуулагчийг агаарт их хэмжээгээр үүсгэдэг нь энэ төслийг хэрэгжүүлэх болсон гол шалтгаан” хэмээгээд үүнээс сэргийлэн Улаанбаатар хотын зүгээс уг төсөлд онцгой анхаарч томоохон ажлуудыг хийж байгаа явдалд НҮБ-ын АҮХГ-ын нэрийн өмнөөс талархал илэрхийлсэн юм.
Эх сурвалж: Улаанбаатар хотын Захирагчийн ажлын албанаас мэдээллээ.
