Цанын ДАШТ эхэллээ

Норвегийн Тронхейм хотод өнөөдөр цанын төр­лүүдийн ДАШТ эхэлж байна. Энэ удаагийн ДАШТ-ий үеэр спорт сонирхогчид Австри, Нор­ве­гийн тамирчдын ширүүн өрсөлдөөн, Т.Йо­­хау­гийн шоу, хоёр төрөлт, М.Рийберийн зодог тай­­лах “ёслол”, Н.Превцийн давамгайллыг шим­­тэн үзэх болов уу. Ингээд “Тронхейм-2025” тэм­­цээ­ний гол мэдээллийг товч танилцуулъя.

Байрлал, хугацаа

Энэ жилийн ДАШТ хоёрдугаар сарын 26-наас гуравдугаар сарын 9-ний хооронд Нор­ве­гийн Тронхейм хотод үргэлжилнэ. Эх орондоо цанын ДАШТ-ийг зохион явуулах норвегчуудын сүүлийн жилүүдийн хүсэл ийн биелэж байгаа юм. Тус улс ДАШТ-ийг түүхэндээ зургаан удаа буюу Осло хотод 1930, 1966, 1982, 2011 онд, Трон­хеймд 1997 онд зохион байгуулж байв.

Спортын төрлүүд

Гүйлтийн цана, хоёр төрөлт, трамплинаас үсрэлт гэсэн уламжлалт “умардын” төрлүүдийн тэмцээн болно. Энэ жил анх удаа пара-цанын төрөл ДАШТ-ий хөтөлбөрт нэмэгджээ. Өнгөр­сөн жилийн ДАШТ-тэй харьцуулахад хэд хэдэн өөрч­лөлт орсны дотор 24 бус, 27 багц медалийн тө­лөө тамирчид өрсөлдөх болсныг онцолъё. 

Хуваарь

Цанын уралдаан маргааш эхлээд, гурав­ду­гаар сарын 9 хүртэл үргэлжлэх бөгөөд энэ хугацаанд тамирчид 12 уралдаанд хурд хү­чээ со­рих юм. Харин хоёрдугаар сарын 28, гу­рав­дугаар сарын 3-нд цаначид амарна. Трамп­линаас үсрэлтийн тэмцээн хоёрдугаар сарын 28-наас гуравдугаар сарын 8-нд болж, тамирчид долоон багц медалийн төлөө өрсөлдөх нь. Тэд гуравдугаар сарын 3, 4-нд амрах хуваарьтай. Харин хоёр төрөлтийн тэмцээн хоёрдугаар сарын 27-ноос гуравдугаар сарын 8, пара-цанын тэм­цээн гуравдугаар сарын 4, 5-нд болно.

Гол найдварууд

Цанын төрөлд мэдээж Норвегийн тамир­чид давамгайлах өндөр магадлалтай. Й.Клебо, Х.Амундсен, С.Хегстад Крюгер, Э.Вальнес, П.Гол­берг нарын гал гарсан өрсөлдөөн үзэгч­дийг уйдаахгүй нь лавтай. Мөн Финландын И.Нис­канен, Шведийн Э.Ангерыг нэмэх хэ­рэгтэй. Эмэгтэйчүүдийн өрсөлдөөн Ф.Карлс­сон, Э.Андерссон, Й.Сундлинг, М.Дальквист, Л.Сван, Ж.Диггинс, Н.Фендрих, А.Слинд, сүүл­чийн ДАШТ-дээ оролцож буй Т.Йохаугийн хоо­ронд өрнөнө. 
Трамплинаас үсрэлтийн гол од нь Н.Превц байх бол түүнтэй К.Шмидт, С.Фрайтаг нар алтан медалийн төлөө өрсөлдөх болов уу. Харин эрэгтэйчүүдийн төрөлд гол өрсөлдөөн Д.Чофениг, Я.Хёрлем, Ш.Крафтын хооронд өрнөх магадлалтай. 
Цанын хоёр төрөлтөд медалийн төлөө Норвегийн супер од Я.Магнум Рийбер болон В.Гайгер, Ю.Шмидт, эмэгтэйчүүдээс Н.Армб­рустер, Х.Касаи, М.Хаген нар өрсөл­дөнө гэсэн “төлгө” бууж байна.

Э.Манлайбаатар