Нийслэлийн удирдах ажилтнуудын өчигдрийн шуурхай зөвлөгөөнөөр авто зогсоолын өнөөгийн нөхцөл байдал болон цаашид авч хэрэгжүүлэх арга хэмжээний талаар хэлэлцлээ. Нийслэлийн Ерөнхий архитектор Ч.Төгсдэлгэр “Төвийн зургаан дүүргийн нийт 1801 байршилд автомашины 113 356 зогсоол бий. Зогсоолын эрэлт Бага тойрууд хамгийн өндөр байдаг. Нэг жолооч зогсоол хайхад дунджаар 26 минут зарцуулдаг гэсэн судалгаа гарсан. Мөн Улаанбаатар хотын хэмжээнд орон сууцад амьдарч буй айл өрхүүд 199 676 тээврийн хэрэгсэлтэй. Гэтэл зогсоолын тоо нь 80 000 буюу хүртээмж 40.1 хувьтай байгаа. Бүрэн хангахад 119 676 зогсоол шаардлагатай” гэлээ.
Хотод өдрийн цагаар оффис орчимд, шөнөөр оршин суугч олонтой орон сууцын хорооллуудын болон холимог бүсэд зогсоолын эрэлт өндөр байгааг судалжээ. Тиймээс нийслэлийн 90 байршилд гадаадын франчайз үйлчилгээтэй, авто зогсоол барихаар төлөвлөж байгаагаа албаныхан хэлсэн.
Ингэснээр зогсоолын тоо 68 900-гаар нэмэгдэж, хүрээмж 75 хувьд хүрнэ гэсэн тооцоог ч гаргасан байна. Мөн 120 мянгат орчимд 7000 орчим далд зогсоол барихаар төлөвлөжээ. Үүний хүрээнд нийслэлийн Засаг дарга Х.Нямбаатар нийтийн эзэмшлийн зам, талбайг хашаалсан зогсоолуудыг чөлөөлөх, ТҮЦ, гарааш буулгах ажлыг эрчимжүүлэх үүргийг холбогдох албаныханд өгөв.
О.Ундрах
