Нийтийн албан тушаалтнууд өөрийн болон гэр бүлийн гишүүдийн орлого, хөрөнгийг худал мэдүүлэх, санаатайгаар орхигдуулах, хуульд заасан үндэслэлийн дагуу мэдүүлгээ шинэчлэн бүртгүүлэхгүй байх зэргээр Авлигын эсрэг болон Төрийн албаны тухай хуулиар хүлээсэн үүрэгтээ хайнга хандах зөрчлүүд гарсаар байгаа. Үүнийг АТГ-ынхан хяналт шалгалтаараа удаа дараа илрүүлдэг билээ. Уг нь Авлигын эсрэг хуулийн 10.3 дахь хэсэгт зааснаар албан тушаалтан нь хөрөнгө, орлогын мэдүүлгээ жил бүрийн хоёрдугаар сарын 15-ны дотор шинэчлэн гаргах, албан тушаалд томилогдсон буюу сонгогдсон өдрөөс хойш 30 хоногийн дотор, мөн хөрөнгө, орлогод нь нэг сарын хөдөлмөрийн хөлсний доод хэмжээг 250 дахин нэмэгдүүлсэнтэй тэнцэх буюу түүнээс дээш хэмжээгээр өөрч¬ лөлт орсон тохиолдолд 30 хоногийн дотор мэдүүлгээ шинэчлэн гаргах үүрэгтэй. Тэгвэл энэ сарын 1-нээс эхлэн хөдөлмөрийн хөлсний доод хэмжээ 792 000 төгрөг болгохоор Засгийн газраас тогтоосон. Үүнтэй холбоотойгоор мэдүүлэг гаргагч нийтийн албан тушаалтан өөрийн болон гэр бүлийн гишүүдийн орлого, хөрөнгөд 198 сая төгрөг буюу түүнээс дээш хэмжээний өөрчлөлт орсон тохиолдолд тухайн орлого, хөрөнгийн талаар 30 хоногийн дотор цахим системд мэдүүлгээ гаргаж бүртгүүлэхээр болж буй юм. Нийтийн албан тушаалтны мэдүүлсэн хөрөнгө нь хууль ёсны орлогоор бий болсон эсэх, эх үүсвэр нь үндэслэлтэй, үгүйг АТГ-аас нарийвч¬ лан шалгадаг бөгөөд хуульд заасан үүргээ хэрэгжүүлээгүй, мэдүүлгээ хуулийн хугацаанд гаргаж өгөөгүй тохиолдолд нийтийн албан тушаалаас чөлөөлөх, ажлаас халах хүртэл хариуцлага хүлээлгэх үндэслэл болдог билээ.
Г.Орчлон
