Инженер, технологийн дээд боловсрол буюу “1000 инженер” төслийг Боловсролын яамнаас 12 дахь жилдээ хэрэгжүүлж байна. Энэ хугацаанд нийт 1000 оюутан, багш, судлаачийг Япон Улсад суралцуулахаар төлөвлөснөөс өнөөдрийн байдлаар 1035 хүн төгсжээ. Тодруулбал, бакалаврын хамтарсан хөтөлбөрт 292, “Коосэн”-д 177, магистр 37, доктор 104, зэргийн бус богино хугацааны сургалтаар 488, нийтдээ 1098 оюутан, багш, судлаач хамрагдсан байна. Харин тэдний 63 нь сургуулиа төгсөөгүй аж. Инженер, техникийн мэргэжилтэн бэлтгэхээс гадна хамтарсан судалгааны хөтөлбөр хэрэгжүүлсэн байна. Үүний хүрээнд МУИС, ШУТИС, ХААИС-ийн хамтарсан 26 баг, Японы 60 гаруй их сургууль, судалгааны хүрээлэнтэй хамтран ажиллаж буй аж. Дээрх гурван их сургуулийн сургалт, судалгааны орчин нөхцөлийг сайжруулах, лабораторийн тоног төхөөрөмж нийлүүлэх ажлыг үе шаттайгаар зохион байгуулснаар 16.9 сая ам.долларын өртөг бүхий, олон улсын түвшинд нийцсэн 686 нэр, төрлийн 3629 тоног төхөөрөмжийг суурилуулжээ. Судалгааны их сургуулийг бий болгосноор багш, судлаачдын арга барил улам сайжрах төдийгүй цаашлаад их сургуулиудын дэргэд гарааны компани байгуулж, улмаар импортыг орлох бүтээгдэхүүн үйлдвэрлэх гэнэ. Мөн гадаад орнуудад өндөр үнээр хийдэг байсан туршилт, шинжилгээг өөрийн сургуулийн лабораторид зардал багатай явуулах боломж бүрджээ. Түүнчлэн энэ хугацаанд Японы их сургууль, эрдэм шинжилгээний хүрээлэнгээс нийт 370 зо¬ чин судлаач манай улсад ирж бакалаврын хөтөлбөрийг шинэчилж, хамтарсан судалгаа, эрдэм шинжилгээний ажилд оролцсон байна. Олон улсын түвшинд хүлээн зөвшөөрөгдсөн эрдэм шинжилгээний сэтгүүлүүдэд 339 өгүүлэл хэвлүүлж, гарааны таван компани байгуулж. Сонирхуулахад, нийт төгсөгчийн 96 хувь нь мэргэжлийнхээ дагуу МУИС, ШУТИС, ХААИС болон “Оюу толгой”, “Таван толгой”, “Эм Си Эс”, “Мобиком”, АПУ зэрэг үндэсний 150 гаруй томоохон компанид амжилттай ажиллаж буй гэнэ.
Өчигдрөөс илүү маргаашийг
бүтээхийн төлөө
