Монгол Улсын Ерөнхийлөгчийн санаачилгаар мазаалай баавгайг хамгаалах цогц арга хэмжээ хэрэгжүүлэх ажлын хэсэг байгуулаад хоёр жил орчмын хугацаа өнгөрчээ. Ажлын хэсэгт Ерөнхийлөгчийн Тамгын газар, Байгаль орчин, уур амьсгалын өөрчлөлтийн яам, Говийн их дархан цаазат газрын А хэсэг зэрэг холбогдох мэргэжлийн байгууллагынхнаас гадна мазаалай судлаач, эрдэмтдийн төлөөлөл багтсан.
Уг ажлын хэсгийнхэн мазаалай хамгаалах чиглэлээр энэ онд хэд хэдэн ажил хийх төлөвлөгөө гаргаж. Тухайлбал, уг амьтны тархац нутаг буюу говийн бүсэд усан хангамжийг нэмэгдүүлэх зорилгоор инженерийн шийдэлтэй хөв цөөрөм байгуулах, хяналтын камер суурилуулах, мазаалайн идэш тэжээлийн бүтцийг эсийн түвшинд тодорхойлох, нэмэлт тэжээлийн чанарыг сайжруулах, сансрын дохиололтой хү¬ зүүвч зүүх зэрэг ажил хийх нь. Түүнчлэн мазаалай баавгайн гадаад, дотоод шимэгчдийг судалж, тархац нутагт нь үүлэнд зориудаар нөлөөлж хур тунадас оруулах арга хэмжээг тогтмол хэрэгжүүлэхээр төлөвлөжээ.
Мөн энэ онд хоёр томоохон ажил хийхээр болж буй нь Олон улсын баавгай судлалын нийгэмлэгийн ээлжит хурлыг Монголд зохион байгуулах, мазаалай судлах төв нээх аж. Ташрамд дурдахад, БНХАУ-ын буцалтгүй тусламжаар хэрэгжүүлж буй “Монгол Улсын говийн мазаалай баавгайг хамгаалах чиглэлээр техникийн туслалцаа үзүүлэх төсөл”-ийн хүрээнд судлаачид хамгийн сүүлд 2022 онд тооллого хийгээд манай орны говийн бүсэд 52 бодгаль тархан нутаглаж байгааг тогтоосон билээ.
Ж.Сувд
