NBA-ийн хамгийн “хурц” оддын нэг хэмээн хэлэгдэх мөч Шэй Гилжес-Александрт иржээ. Тэрбээр энэ улирлын Үнэ цэнтэй тоглогчийн шагналыг хүртэх боломжтой болоод байгаа юм. Түүнтэй “Slam” сэтгүүлийн сурвалжлагч Ф.Каллегийн ярилцсаныг сонирхуулъя.
-Одоогийн байдлаар таныг улирлын үнэ цэнтэй тоглогчоор шалгарах хамгийн өндөр магадлалтай гэж бооцооны компани, хэвлэл мэдээллийнхэн үзэж байна. Та иймэрхүү зүйлд хэр их анхаарал хандуулдаг вэ. Таны хувьд энэ шагналыг хүртэх нь хэр чухал вэ?
-Энэ түвшинд хүрэхийн тулд би маш их зүйлийг даван туулсан. Заримдаа аз, заримдаа бусдын тусламж, заримдаа шаргуу хөдөлмөр гэх мэт. Маш олон учрал тохиол, аз эз зэрэгцэж байж би энэ зэрэгт хүрсэн, үүний төлөө хувь заяандаа маш их талархдаг. Үнэхээр гайхалтай. Мэдээж улирлын дундуур, нэгдүгээр сард ямар ч аварга тодордоггүй. Гэхдээ би одоогийн түвшиндээ хүрч, бусдын анхаарлыг татаж, багаа ялахыг харах юм бол бүх зүйл зөв зүг рүүгээ хандаж байгаа гэж бодож байна. Би одоогоор нэг ч зорилгодоо хүрээгүй учраас сэтгэл хангалуун биш байгаа. Надад хийх зүйл маш их бий. Тэр хүртэл хөдөлмөрлөхөө зогсоохгүй. Гэхдээ л зөв замаараа явж байгаа гэдэгтээ бат итгэлтэй байна.
-Таныг энэ улиралд үнэ цэнтэй тоглогчоор тодрох нь баттай, тэр байтугай өнгөрсөн улиралд ч энэ шагналыг авах ёстой байсан гэж Энтони Эдвардс хэлсэн. Өөр нэг од тоглогч таныг ингэж магтсан нь ямархуу санагдаж байна вэ?
-Лигийн тоглогчид маш өндөр түвшинд тоглодог. Тэд тамирчны амьдралын сорилтыг, өдөр тутмын амьдралыг хамгийн сайн мэддэг. Миний хийж байгаа зүйлийг тэд өөрсдөө өдөр тутам хийдэг, ийм түвшинд тоглохын тулд юуг золиосолж байгааг ойлгодог учраас тоглогчдын санал надад хамгийн утга учиртай юм. Тийм болохоор надад сайхан санагдаж байна.
-Өнгөрсөн жил уг шагналыг хүртэх ёстой байсан гэдэгтэй та санал нийлж байна уу?
-Тэр талаар би нэг их бодохгүй байна. Энэ бол миний хянаж чадахгүй зүйл шүү дээ. Хүмүүс хэнд саналаа өгөхийг хянах боломжгүй. Өнгөрсөн жил маш их хичээж, өөрийнхөө хамгийн шилдэг тоглолтыг харуулахыг хичээсэн. Гэхдээ л тэр бүхэн хангалтгүй байж. Тиймээс энэ жил өөрийгөө хангалттай сайн гэдгийг батлан харуулахыг зорилгоо болгож өнгөрсөн зунжин бэлтгэл хийсэн.
-Таныг Аллен Айверсонтой адилтгадаг хүмүүс бий. Та тэрхүү харьцуулалтын талаар мэдэж байна уу?
-Тийм зүйл сонсож байгаагүй. Улирлын дундуур би нийгмийн сүлжээ ашиглахгүй хичээдэг. Гэхдээ ингэж харьцуулж буй нь хүндэтгэлтэй санагдаж байна. Бага байхад миний хамгийн дуртай тоглогч Аллен Айверсон байсан. Тэр бол багадаа миний үсээ сүлждэг, толгойны кисттэй тоглодог, ерөөс сагсан бөмбөгт дурлах болсон шалтгаан маань. Тийм болохоор надад энэ харьцуулалт үнэхээр онцгой санагдаж байна. Сагсан бөмбөгийн төлөө, талбайн гадна болон талбай дээрх соёлыг өөрчлөхийн төлөө түүний хийсэн зүйлийг юутай ч зүйрлэшгүй юм.
-Их олон амжилтад хүрэх ёстой гэж та хэлсэн. Таны зорилгын жагсаалтад юу юу багтаж байна вэ?
-Хамгийн гол зорилго бол мэдээж аваргалах. Үүний төлөө л бид сагсан бөмбөг тоглож байгаа шүү дээ. Есдүгээр ангидаа сургуулийнхаа шигшээ багт ороод хотын аварга болохыг хүсэж байсан. Дэлхийн сагсан бөмбөгийн хамгийн дээд, хамгийн том тайзан дээр би ялахыг хүсэж байна. Энэ л миний зорилго, цорын ганц анхаарч буй зүйл маань. Хэрэв хэзээ нэг өдөр энэ зорилгодоо хүрвэл санаа минь амарна.
Н.Энх
