Мэдээлэл, технологийн үндэсний парк болон “Нью тур сафарис” ХХК-ийн хооронд үүссэн талбайн түрээсийн маргааны шүүх хурал Баянзүрх, Сүхбаатар, Чингэлтэй дүүргийн Иргэний хэргийн анхан шатны тойргийн шүүхэд уржигдар болж, тухайн барилгыг эзэмшигч буюу нэхэмжлэгч байгууллагын талд шийдвэр гарчээ. Тодруулбал, Мэдээлэл, технологийн үндэсний паркийн байрнаас “Өргөө-2” кинотеатрыг албадан чөлөөлж, газраа буцаан авах нь зүйтэй хэмээн шүүх үзсэн байна. Эргэн сануулахад, “Нью тур сафарис” ХХК нь 2012-2022 оны хооронд тус паркад кинотеатрын зориулалтаар талбай түрээслэх гэрээ байгуулсан ч хугацаандаа байраа чөлөөлөөгүй, нэг ам метрийг нь тухайн үеийн ханшаар буюу зах зээлийнхээс 5-9 дахин хямд өртгөөр тооцон түрээсэлж ирснийг Мэдээлэл, технологийн үндэсний паркийн захирал Ж.Золзаяа мэдээлж байв. Түүнчлэн талбай чөлөөлөх шаардлага тавихад ямар ч үндэслэлгүйгээр МТҮП-аас 5.1 тэрбум төгрөг нэхэмжилсэн хэмээн мэдэгдсэн билээ. Иймд тус паркийн удирдлага “Сод Монгол групп”ийн охин компани болох “Нью тур сафарис” эсрэг шүүхэд нэхэмжлэл гаргасан юм. Шүүх хуралдаан есөн удаа хойшилсны эцэст уржигдар анхан шатны шүүх ийн шийдвэрлэжээ. Хариуцагч тал хугацаа хожих үүднээс давж заалдан, шүүх хурлыг сунжруулах магадлалтайг Ж.Золзаяа тодотгосон.
Ж.Сувд
