Хөдөлмөр, нийгмийн хамгааллын яам, түүний харьяа байгууллагууд болон Гадаадад төгсөгчдийн нэгдсэн зөвлөл хамтран “CAREER EXPO-2023” залуучуудын хөдөлмөрийн өдөрлөг зохион байгуулжээ. Аравдугаар сарын 30-нд эхлүүлсэн эл өдөрлөг өнгөрсөн амралтын өдрүүдэд хаалтаа хийж, тайлангаа гаргажээ.
Их, дээд сургуулиудын дунд зохион байгуулсан эл өдөрлөгт олон мянган оюутан, залуус оролцсоноос 418 нь ажилтай болж, орлого олох боломж нь нээгджээ. Тус өдөрлөгийг хуваарийн дагуу 2023.10.30-2023.11.10-ны өдрүүдэд 10 их сургуульд зохион байгуулсан байна. Улмаар оюутан, залуучуудад нийт 2 131 цагийн ажлын байрыг санал болгосноос 606 оюутан бүртгүүлж, 418 оюутан цагийн ажилд орж чадсан байна. Мөн хөдөлмөрийн зах зээлийн талаарх болон ХАБЭА-н хууль тогтоомжийн мэдээлэл, зөвлөгөөг 2,200 орчим залуучуудад хүргэлээ.
Өдөрлөгт Монгол Улсын их сургууль, Отгонтэнгэр их сургууль, Монгол Улсын Боловсролын их сургууль, Хүмүүнлэгийн ухааны их сургууль, Үндэсний батлан хамгаалахын их сургууль, Их засаг их сургууль, Анагаахын шинжлэх ухааны үндэсний их сургууль, Этүгэн их сургууль, Шинжлэх ухаан технологийн их сургууль, Олон улсын Улаанбаатарын их сургууль оролцжээ.
