“Шүүхийн шийдвэр гүйцэтгэх тогтолцоог шинэчлэх шаардлагатай”

УИХ-ын Хууль зүйн байнгын хорооноос Европын сэргээн босголт, хөгжлийн банктай хамтран “Иргэний шүүхийн шийдвэр гүйцэтгэлийн эрх зүйн орчныг боловсронгуй бол­гох нь” сэдэвт олон улсын онол, практикийн хур­лыг өчигдөр зохион байгууллаа. Байнгын хорооны дарга Д.Цогтбаатар хур­лыг нээж “Шийдвэр гүйцэтгэх ажиллагааны эрх зүйн орчныг боловсронгуй, шуурхай, үр дүнтэй болгох арга замыг эрэлхийлж, шийдвэрлэх зорилгоор энэхүү хур­лыг зохион байгуулж байна. Шүүхийн шийдвэрийг хэрэг­жүү­лэх асуудал нь шүүхээс тусдаа ойлголт биш. Гүйцэтгэх ажиллагаа явуулж буй хүмүүсийн санаа бодлыг тусгах нь чухал” гэдгийг онцлов. Харин Хууль зүй, дотоод хэргийн сайд О.Алтангэрэл “Шүүхийн шийдвэр гүйцэтгэх тухай хуульд нэмэлт, өөрчлөлт оруулж, хаврын чуулганаар хэлэл­цүү­лэхээр төлөвлөсөн. Гүйцэтгэх ажиллагааны төлөв бай­дал, хувь хэмжээ буурсан энэ үед тус хэлэлцүүлэг хувь нэмэр оруулна гэдэгт итгэлтэй байна” гэсэн юм.
Европын Холбооноос Монголд суугаа Элчин сайд Ина Марчюлёните “Эдийн засгийг төрөлжүүлж, гадаадын хө­рөнгө оруулалтыг татах нь Монгол, Европын Холбооны хоо­рондын түншлэлийн хэлэлцээрт тусгагдсан, Засгийн газрын тэргүүлэх зорилтуудын нэг юм. Тус семинар нь харилцан туршлага солилцох, оновчтой саналуудыг хэлэлцэн, иргэний болон арилжааны шүүхийн шийдвэр гүйцэтгэх ажиллагаанд шинэчлэлт хийх замаар тэргүүлэх зорилтуудыг биелүүлэх боломжтой” гэв. Тэгвэл Олон улсын шүүхийн шийдвэр гүйцэтгэгчдийн холбооны тэргүүн дэд ерөнхийлөгч Йос Уйтдэхааг шүүхийн шийдвэр гүйцэтгэх ажиллагааны олон улсын шилдэг туршлагыг, салбарын сайд О.Алтангэрэл Монгол Улсын шүүхийн шийдвэр гүйцэтгэх тогтолцооны эрх зүйн шинэчлэлийн үзэл баримтлалын талаар танилцуулсан бол Европын сэргээн босголт, хөгж­лийн банкны хуулийн зөвлөх З.Шагдарсүрэн Шүүхийн шийд­вэр гүйцэтгэх тухай хуульд нэмэлт, өөрчлөлт оруулах тухай санал, зөвлөмжийг тоймлон хүргэлээ. 
Хуралд оролцогчид шийдвэр гүйцэтгэгчдийн орон тоог нэмэгдүүлж, алба хаагчдын мэдлэг, ур чадварыг дээш­лүү­лэхэд анхаарах шаардлагатайг, цаашлаад шийдвэр гүй­цэт­гэх ажиллагааны шатанд алдаа гаргаснаас үүдэлтэйгээр төл­бөр төлөгчдөд давуу байдал олгох зэрэг асуудал гарч буйг дурд­сан. Мөн шүүхийн шийдвэр гүйцэтгэх тогтолцоог бэх­жүү­лэхийн ач холбогдол, эрх зүйн шинэчлэлийн үр нөлөө, олон улсын хамтын ажиллагааны боломжийн талаар санал солилцов.

М.Гэгээ