Түүнийг Трамптай зүйрлэх нь ч бий

Миланович 2024 оны арванхоёрдугаар сард Ерөнхийлөгчийн сонгуульд хоёр дахь удаагаа нэрээ дэвшүүлэв. Тэрбээр сонгуулийн эхний шатанд олонхын санал авч чадалгүй 49 хувийн дэмжлэг хүлээсэн. Гэсэн ч энэ оны нэгдүгээр сард хоёрдугаар шатанд өр­сөлдөж сонгогчдын 74.69 хувийн саналаар Хор­ватын Ерөнхийлөгч боллоо. 1991 онд тус улс өрх тусгаарласнаас хойш Ерөнхийлөгчид нэр дэв­шигч­дээс хамгийн олон санал авсан үзүү­лэлт нь энэ аж.
2020 оны хоёрдугаар сарын 24-нд Имотски хо­тод болсон их наадмын үеэр хүүхэд тэ­вэр­сэн ижил хүйст хоёрыг дүрсэлсэн чихмэл ша­таасныг Миланович ихэд буруушааж, уг үйлд­лийг “хүмүүн бусын, эвлэрэх боломжгүй” хэ­мээн үзсэн юм. Улмаар уг арга хэмжээг зо­хион байгуулагчдыг уучлалт хүсэхийг шаар­даж, бусдыг үзэн ядах нь цаашдаа Хорватын уламж­­лал байх ёсгүй гэж мэдэгдсэн байна. Орос, Украины хямрал шинээр шатлан өргөжиж эхэлж байхад Украинд хийсэн Ерөнхий сайд Анд­рей Пленковичийн айлчлалыг тэр бас шүүм­жилж байв. Украины 15 мянган цэргийг Ев­ропт сургалтад хамруулах санаачилгыг дэм­жих­гүй байгаагаа 2022 оны аравдугаар сард мэдэгд­сэн нь өөрийн улсыг энэ ажиллагаанд татан оруулахыг хүсээгүйтэй нь холбоотой аж. “Энэ ажиллагаа дайнд хүргэнэ” гэж тэр хэлсэн байдаг. 
“Украин дахь дайнд НАТО татагдаж ор­лоо. НАТО, Вашингтон хоёр Украины тусламж­тай­гаар Оростой дайн хийж байна” гэж Хорватын Ерөн­хийлөгч мэдэгдсэн удаатай. Москвагийн эсрэг хориг тавьсныг утгагүй ажиллагаа гэж үзээд, “Путинийг зайлуулах төлөвлөгөө байж бо­лох­гүй. Хориг тавиад бид юунд ч хүрэхгүй. Хори­гоор Милошевичийг ч зогсоож чадаагүй шүү дээ” гэж мэдэгдэж байжээ. 2023 оны зур­гаа­дугаар сард “Украины алдар бадраг” гэх уриа Германы “Зиг хайль” юм уу, Хорватын үнд­сэр­хэг үзэлтнүүдийн “Эх орныхоо төлөө-бэлэн” гэд­гээс төдийлөн ялгарахгүй” гэж хэлээд Зоран Ми­ла­нович Европын Холбооны улс төрчдийн шүүмж­лэлийн бай болж байв.
Оростой хийж буй Украины дайныг Өрнөд дэмжиж байгааг Миланович шүүмжилдэг. Түүнч­лэн консерватив үзэлт Ерөнхий сайд Анд­рей Пленкович, түүний Засгийн газрыг тэрбээр эрс эсэргүүцдэг. Саяны сонгуулийн дүнг дуул­гас­ны дараа Миланович хэлэхдээ “Энэ ялалт бол сонгогчдын зүгээс дэмжиж, итгэж буйн тэмдэг, улс орны ажил хэргийн талаарх элч зарлага юм. Түүнийг сонсохыг Засгийн газраас хүсэж байна” гэсэн аж.
Зоран Миланович Хорватын хамгийн нэрд гарсан улс төрч. Улс төрийн өрсөлдөгчдөдөө нэлээд эрс ширүүн ханддаг арга барилаар нь АНУ-ын саяхан сонгогдсон Ерөнхийлөгч Дональд Трамптай жиших нь бий. Дөрвөн сая шахам хүнтэй Хорват улс өсөн нэмэгдэж буй инфляц, ав­лига, ажиллах хүчний ду­таг­дал зэрэгтэй тэм­цэл хийж буй үед энэ сонгууль тохиов. Сон­гуу­лийн санал авах хэсэгт Ми­ланович “олон талаар ард­чилсан биш”, сон­гуулиар гарч ирээгүй хү­мүүсээр удир­дуулсан Европын Холбоог дахин шүүмжлэв. “Та над­тай санал нийлэхгүй байгаа бол миний дайсан” гэсэн байр сууриар ханддаг Европт ажиллаж, амьдрахыг хүсэхгүй байна. Тиймээс үүнийг өөрчлөхийн төлөө жи­жиг ул­сын Ерөнхийлөгчийн чадах бүхнийг хийх болно” гэж хэлжээ.
Милановичид байнга шүүмжлүүлдэг Ерөн­хий сайд Андрей Пленкович түүнийг Оросын чиг баримжаатай гэдэг аж. Бас  Хорватын олон улсын байр байдалд аюул заналхийлүүлсэн улс төрч гэж үздэг. Өөрийгөө ийм байр суурьтай гэд­гийг Миланович үгүйсгэдэг ч “Украины аюул­гүй байдлыг хангахад тусалж, сургалтад хам­рагдах” нэрээр Герман руу Хорватаас таван офицер явуулахыг Миланович зөвшөөрөөгүй гэнэ. НАТО-гийн ямар ч далбаан дор Украин руу Хорватаас цэрэг явуулахыг огт зөвшөөрөхгүй гэж бүр амласан байна.
Зоран Миланович 2025 оны нэгдүгээр сарын 12-нд Хорватын Ерөнхийлөгчөөр улиран сон­гогд­­лоо. Тэрбээр 2020 оноос Хорватын Ерөн­хий­­лөг­чөөр ажиллаж байна. Саяны сонгуулийн сур­тал­чилгааны үед Европоос Украин руу цэрэг илгээхийг Миланович эсэргүүцжээ. Сон­гуу­лийн хоёрдугаар шатанд Боловсролын сайд бай­сан, Өрнөдийн талын бодлого баримталдаг Дра­ган Приморац өрсөлджээ. Миланович 2020 онд Ерөнхийлөгч болохоосоо өмнө Социал-демократ намыг тэргүүлж байж. 
Тэрбээр 1966 онд Загреб хотод төржээ. Зүүн төвийн үзэлтэй, 2011-2016 онд Хорватын Ерөн­хий сайдаар ажиллаж байв. Загребийн их сур­гуулийг онц дүнтэй төгсөж хуульч мэргэ­жил­тэй болсон байна. 1998 онд Брюсселийн их сур­гуулийг төгсөж Европын олон улсын эр­­хийн салбарын мэргэжилтэн болов. Орос, анг­ли, франц, герман хэлтэй. Хуульч болоод Заг­ребийн нэгэн шүүхэд ажиллаж байгаад 1993 онд Гадаад хэргийн яаманд очив. Энд ирээ­дүйд улс төрийн өрсөлдөгч нь болсон, Ерөн­хий сайдаар ч ажилласан, авлигын хэргээр 10 жи­лийн ял сонсож, шоронд ч сууж байсан Иво Сандерийн удирдлагад ажиллах болжээ. Нэг жилийн дараа Европын аюулгүй байдал, хам­тын ажиллагааны байгууллагын шугамаар Уулын Карабахад ажиллахаар явав. 1996 онд Ев­ропын Холбоо хийгээд НАТО-гийн дэргэдэх Хор­ватын төлөөлөгчийн газарт зөвлөх боллоо. Энд байхдаа аспирантур төгсөж, 1999 онд Га­даад хэргийн яамандаа буцан иржээ. 
Чухам энэ үеэс түүний улс төрийн ша­таар өгсөх зам нь эхэлсэн аж. Хорватын ком­мунис­туу­дын холбоо гэх байгууллагын сууринд 1990 онд үүсэн бий болсон Социал-демократ намд элсэв. 2000 оны сонгуульд тус нам ялж, Миланович Гадаад хэргийн яамыг НАТО-той холбох ажил эрхлэх болжээ. Гурван жилийн дараа Гадаад хэр­гийн сайд Тонино Пицулын туслах болов. 2003 онд сонгуульд нам нь ялагдсанаар энэ аж­лыг орхисон байна. 2004 онд намынхаа Төв хо­роонд орж, хоёр жил болоод хэсэг хугацаанд хэвлэлийн нарийн бичгийн даргаар нь ажиллав. 2007 оны зургаадугаар сард болсон ээлжит бус Х их хурлаар Социал-демократ намын даргаар сон­гогдлоо. Энэ намын нэр хүнд эрс өсөж, 2007 оны пар­ламентын сонгуульд ялалт байгуулна гэж үзэж бай­сан. Гэвч Милановичийн улс төрийн турш­ла­га дутаж нам нь ялагдаж, томоохон сөрөг хү­­­чин болов. 2011 оны наймдугаар сард Ми­ла­но­вич эвсэл байгуулж, түүнд нь Хорватын ар­дын нам, Истрийн ардчилсан ассамблей, Тэт­гэв­рийнхний нам ч нэгджээ. 2011 онд тус эв­сэл пар­ламентын ээлжит сонгуулиар олонх бол­лоо. 2019 онд Миланович Ерөнхийлөгчийн сон­гуульд өрсөлдөж, хоёрдугаар шатанд нь ялж Төрийн тэргүүнээр сонгогдсон байна. Ийнхүү Хорват тусгаар тогтносноос хойш тав дахь Ерөн­хийлөгч нь болж, 2020 оны хоёрдугаар са­рын 18-наас бүрэн эрхээ хэрэгжүүлж эхэл­жээ.
Улс төрөөс Миланович түр хөндийрч, биз­нест хөл тавьж “Euro аlba” гэдэг компани ажил­­луулж үзсэн байна. 2017 онд Албанийн Ерөн­хий сайд Эди Рамын зөвлөхөөр ч бас ажил­лаж бай­жээ.
Миланович 1994 онд гэрлэсэн. Гэргийг нь Саня  Мусич гэдэг. Тэд хоёр хүүхэдтэй.