ШУА-ийн Биологийн хүрээлэнтэй танилцуулах өдөрлөгийг энэ сарын 23-нд 11.00-17.00 цагт зохион байгуулна. Тус хүрээлэн нь есөн лабораторитой. Тухайлбал, шувуу, шавж судлал, хөхтний экологи, гидробиологи, загас судлал, ургамлын биотехнологи, молекул биологийн лаборатори тэнд бий. Өдөрлөгөөр дамжуулан оюутан, залууст биологийн олон янз байдлыг таниулах, мэргэжлийнхээ талаар мэдээлэл өгөх зорилготой аж. Үүнд оролцсоноор сүүлийн үеийн судалгаа, шинжилгээ, туршилтын ажлуудыг сонирхох боломжтой. Энэ үеэр биологийн мэргэжлээр суралцах төлөвлөгөөтэй хүүхдүүд мэргэжилтнүүдээс зөвлөгөө авч болно.
Ташрамд дурдахад, Биологийн хүрээлэнгийн Гидробиологийн лабораторийнхон өнгөрсөн онд “Монгол орны загас” гэрэл зургийн ном, “Өгий нуурын гүний амьдрал” баримтат кино бэлтгэж, олон нийтэд хүргэсэн билээ.
А.Үүл
