Онцгой байдлын байгууллагын хойд бүсийн дуудлага хүлээн авагч, аврагч-жолооч холбоочид сургалт, дадлагын үеэр сурч мэдсэн мэдлэг, мэдээлэл болон харилцаа холбоо, мэдээллийн технологийн чиглэлийн мэргэжлийн ур чадвар, хурд, хүч, авхаалж самбаа, оюун ухааныг сорьсон буухиа тэмцээнийг алба хаагчдын дунд зохион байгууллаа.
Буухиа тэмцээн нь "Эрэн хайх ажиллагаа", "Холбооны техник хэрэгслийн бэлтгэл бэлэн байдал хангах", "Мэдээллийн технологийн үйл ажиллагааг хангах", "Байнгын болон гамшиг, ослын үед холбоо зохион байгуулах", "Агаараас тандалт хийх", "Сүлжээний гэмтэл саатлыг илрүүлэх, засварлах, сүлжээний холболт хийх" гэсэн 6 төрлөөс бүрдсэн бөгөөд алба хаагчид сүлжээний толгой хавчих, засварын болон холбоо, мэдээллийн технологийн чиглэлийн техник хэрэгслийг ажиллагаанд бэлтгэх, холбоо зохион байгуулах зэрэг мэргэжлийн олон талт ур чадварыг шаардсан даалгавруудыг хийж гүйцэтгэлээ.
Тэмцээнд нийт 10 баг оролцсон бөгөөд нэгдүгээр байрт СОЁМБО баг, хоёрдугаар байрт ОЮУ баг, гуравдугаар байрт НАЙРАМДАЛ баг шалгарч, тэмцээний шагналын ивээн тэтгэгчээр “Юнител” ХХК, “Мобиком” ХХК, “Хайтик” ХХК тус тус ажиллалаа.
Баг тус бүр Онцгой байдлын байгууллагын хойд бүсийн 7 аймгийн дуудлага хүлээн авагч, аврагч-жолооч холбоочдоос бүрдсэн бөгөөд багийн гишүүдийн оролцоо, алба хаагчдын эв нэгдэл, хамтын хүч, харилцаа холбоо, мэдээллийн технологийн чиглэлийн мэргэжлийн ур чадвар, цэргийн дүрэм болон биеийн тамирын бэлтгэлжилт зэргийг нэгэн зэрэг шалгасан нь тэмцээний онцлог байв.
Цаашид алба хаагчдын харилцаа холбоо, мэдээллийн технологийн чиглэлийн мэргэжлийн ур чадварыг сайжруулах зорилгоор уг буухиа тэмцээнийг байгууллагын хэмжээнд хоёр жил тутамд “Холбоочдын цогцолбор буухиа тэмцээн” нэртэйгээр зохион байгуулахаар төлөвлөж байна.
