АНУ-ын “Интер Майами” баг Лигийн цомын шөвгийн 16-д “Даллас” багийг буулган авч, дараагийн шатанд шалгарахад шинэ тоглогч Л.Месси гол үүрэг гүйцэтгэлээ. Тэрбээр багийнхаа эхний болон нэн чухал тэнцээний (4:4) гоолыг оруулсан юм.
Ийнхүү шинэ багтаа үзүүлж буй Л.Мессигийн статистик үзүүлэлт гэрлийн хурдаар нэмэгдэж байна. Тэрбээр “Интер Майами”-гийн төлөө дөрвөн тоглолтод оролцохдоо долоон гоол оруулж, нэг оновчтой дамжуулалт өгснөөр тус багийн түүхэн дэх шилдэг мэргэн буучдын жагсаалтын дөрөвдүгээр байрт орж ирлээ. Түүний өмнө Р.Тэйлор, Л.Кампана, Г.Игуаин нар бичигдэж буй. Л.Месси сүүлийн гурван тоглолтдоо дараалж дубль оруулсан. “Даллас”-ын эсрэг тоглолтоос өмнө тэрбээр “Орландо”, “Атланта”-гийн хаалгыг хоёр гоолоор мялаасан бол “Крус асуль”-ийн эсрэг эхний тоглолтод хожлын цор ганц гоолыг оруулж байв.
Түүнээс гадна Лео хөлбөмбөгийн түүхэнд хаалттай цохилтоос оруулсан гоолын дээд амжилтад улам дөхсөөр байна. “Даллас”- ын эсрэг тулаанд тэрбээр 64 дэх гоолоо
бүртгүүлсэн агаад түүний өмнө Жуниньо Пернамбукано (77 гоол), Пеле (70), Виктор Легроталье, Роналдиньо (тус бүр 66), Дэвид Бекхэм (65) нар бичигддэг. Л.Месси тун ойрын хугацаанд шинэ багийнхаа эзэн Д.Бекхэмийн амжилтыг гүйцэх нь гарцаагүй юм.
Лигийн цомын тэмцээн бол MLS-ын багуудаас гадна Мексикийн дээд лигийн багууд оролцдог зуны тэмцээн билээ. Тус тэмцээн 2019 онд анх удаа болоход Мексикийн “Крус асуль” түрүүлж байв. Тухайн үед ердөө найман баг оролцож, тоглолт шууд плей-оффын шатнаас эхэлсэн. Харин 2020 онд коронавирусийн цар тахлын улмаас болоогүй бол дараа жил нь найман баг оролцож, Мексикийн “Леон” түрүүлжээ. Харин өнгөрсөн жил MLS, Мексикийн лигийн багуудын өндөр ачааллаас шалтгаалж ердөө таван үзүүлэх тоглолт явагдаад тус тэмцээн дууссан аж.
Энэ жил зохион байгуулагчид томоохон өөрчлөлт хийснээр MLS, Мексикийн лигийн бүх баг тус тэмцээнд оролцож байна. Багууд гурав гурваараа 15 хэсэгт хуваагдан тоглож, хэсэгтээ эхний хоёр байр эзэлсэн баг наймдугаар сарын эхээр эхэлсэн хасагдах шатанд шалгарчээ. Улмаар лигийн цомын тэмцээний аварга багийн нэр энэ сарын 19-нд тодрох юм. Шилдэг гурван баг нь КОНКАКАФ-ын “Аваргуудын лиг”-т тоглох эрхээ авах бол ялагч нь тус тэмцээний шөвгийн 16-д шууд шалгарч тоглоно.
Л.Месси тэргүүтэй “Интер Майами” баг хэсэгтээ хоёр ялж, хасагдах шатанд шалгарсан бөгөөд “Орландо”, “Даллас”-ыг ялснаар шилдэг наймд үлдээд байна. Тэд энэ шатанд “Шарлотт”, “Хьюстон”-ы аль хожсонтой ньтаарах учиртай. Харин MLS лигт “Интер Майами”-гийн байдал асар муу байгаа гэж болно. Тус баг бүсдээ төдийгүй лигтээ хомоол хамж байна. Түр завсарлаад буй улирлын тоглолт энэ сарын сүүлчээр дахин эхэлж, аравдугаар сарын эцэсхүртэл үргэлжилнэ. “Интер Майами” багт 12 тоглолт үлдээд буй учир багаа хүнд байдлаас гаргаж, плей-оффт шалгаруулах боломж Л.Мессид бий.
Бэлтгэсэн: Э.Манлайбаатар
