Нийслэлийн Сонгинохайрхан дүүргийн Гэр бүл, хүүхэд, залуучуудын хөгжлийн хэлтэс Зэвсэгт хүчний 013, 017, 150, 345 дугаар нэгтгэл, ангиудтай хамтран "Монгол хүүхдүүд" өдөрлөгийг зохион байгууллаа.
Өдөрлөгт 1000 хүүхэд, 3000 гаруй иргэд оролцож зэвсэг, техникийн үзэсгэлэн, урлагийн энтертайнмент үзүүлбэр, цэргийн алба хаагчдын жагсаалын болон гардан тулааны үзүүлэх тоглолтыг үзэж сонирхлоо.
Мөн хүүхэд багачуудын дунд шохойн зургийн болон дугуйн уралдаан, 3х3 сагсан бөмбөгийн тэмцээнийг тус тус зохион байгуулж, өргөмжлөл, гарын бэлэг гардуулсны зэрэгцээ 10 супер азтаныг шалгаруулсан юм.
Түүнчлэн энэ үеэр Зэвсэгт хүчний 013, 017, 150, 345 дугаар нэгтгэл, ангийн шилдэг зургаан цэргийн алба хаагчид Нийслэлийн "Шилдэг залуу” алтан медаль, дөрвөн хүүхдэд Нийслэлийн Гэр бүл, хүүхэд, залуучуудын хөгжлийн газрын алтан медалийг тус тус хүртээв.
Ташрамд дуулгахад тус өдөрлөгт "Дэлхийн зөн" олон улсын байгууллага, Нийслэлийн Сонгинохайрхан дүүргийн Улаан загалмайн хороо, Хүүхдийн зөвлөлийн сурагчид, сайн дурын ажилтнууд ажиллаж хүүхэд хамгаалал, аюулгүй байдлыг хангах үйлчилгээг үзүүлсний зэрэгцээ өдөрлөгийн үйл ажиллагааг дэмжин “Сүү”, “Алтан тариа”, “Тесо” компаниуд 1000 гаруй хүүхдэд гарын бэлгийг хандивласан юм.
Эх сурвалж: Дэслэгч Н.Ууганцэцэг
