Монгол Улсын Засгийн газрын гишүүн, Батлан хамгаалахын сайд Г.Сайханбаяр, ЗХЖШ-ын дарга бригадын генерал С.Ганбямба болон БХЯ, ЗХЖШ-ын удирдлагууд Завхан аймагт ажиллалаа.
Батлан хамгаалахын сайдыг хүрэлцэн ирэхэд Улиастай цэргийн хүрээний хүндэт харуул жагсаж, ёслол төгөлдөр угтлаа. Үргэлжлүүлэн Зэвсэгт хүчний 325 дугаар ангийн захирагч хурандаа Б.Баярсайхан ангийнхаа түүх, үйл ажиллагаа, дэвшүүлсэн зорилго зорилт, тулгамдсан асуудлуудаа танилцуулав.
Анги хуулиар хүлээсэн үндсэн үүргээ гүйцэтгэхийн зэрэгцээ офицер, ахлагч, ажилтан албан хаагчдынхаа ажиллаж, амьдрах орчин нөхцөлийг сайжруулах хүрээнд орон нутгийн төсвийн хөрөнгө оруулалт, өөрсдийн нөөц бололцоонд тулгуурлан ангийн байрлал дахь объектуудын засвар, тохижилтын ажлуудыг хийж гүйцэтгэсэн талаар илтгэсэн юм. Мөн тус аймагт үйл ажиллагаа явуулж буй төрийн цэргийн болон хууль сахиулах байгууллагуудтай хамтын ажиллагаагаа өргөжүүлэх хүрээнд хамтарсан сургууль дадлага, урлаг спортын тэмцээн уралдааныг тогтмол зохион байгуулдгаа онцлов.
Үүний дараа Батлан хамгаалахын сайд Г.Сайханбаяр салбаруудын бие бүрэлдэхүүнтэй уулзаж, Засгийн газрын үйл ажиллагаа, Батлан хамгаалах бодлого, зорилтын талаар танилцуулав. Тэрбээр “Алсын хараа 2050” болон “Шинэ сэргэлтийн бодлого”-ыг хэрэгжүүлэхэд Батлан хамгаалах, Зэвсэгт хүчний үүрэг оролцоо өндөр байгааг онцоллоо. Түүнчлэн Батлан хамгаалахын эрх зүйн шинэчлэл, Зэвсэгт хүчний ирэх зууны өнгө төрх сайд, удирдлагуудаас гадна Зэвсэгт хүчинд алба хааж байгаа хүн нэг бүрээс хамааралтай гэдгийг онцлоод цаашид эрхэлсэн ажилдаа эзэн болж, хандлагаа өөрчилж, хариуцлагаа нэмэгдүүлэхийг уриалсан юм. Батлан хамгаалах, Зэвсэгт хүчин нь сүүлийн жилүүдэд хөнгөн хуягт техникүүдийг дотооддоо үйлдвэрлэж, зэвсэглэлд туршсаны зэрэгцээ бага бууны сумны үйлдвэр байгуулах болсноор бүтээн байгуулагч салбар болох үндэс суурь тавигдсаныг салбарын сайд хэллээ.
Мөн цаашид Зэвсэгт хүчин болон Агаарын цэргийн зэвсэглэл техникийг шинэчлэх, хөгжүүлэхэд тал бүрээр дэмжихээ илэрхийлж, бие бүрэлдэхүүнд ажлын өндөр амжилт, гэр бүлд нь аз жаргал эрүүл энхийг хүссэн юм.
Төгсгөлд нь Батлан хамгаалахын сайд салбаруудад тулгамдсан зарим асуудлыг ойрын хугацаанд шийдвэрлэхийг холбогдох албан тушаалтнуудад үүрэг болгосны зэрэгцээ олон үйлдэлт ухаалаг дэлгэц болон портер машины түлхүүрийг ангийн захирагчид гардуулан өгөв.
