“Г.Мэнд-Ооёогийн уран бүтээлийн судлал шинжлэл-2022” олон улсын эрдэм шинжилгээний бага хурал “Чингис хаан” музейд боллоо. Румын улсын Михай Эминескүгийн олон улсын академийн ерөнхийлөгч, академич Ион Диконискү энэ үеэр “Мэнд-Ооёо-бүтээлч сэтгэлгээний гал дөл”хэмээх илтгэл тавьсан байна. Мөн тэрбээр тус академийн хүндэт шагнал “Grand trophée” хэмээх алтан цомыг Монголын зохиолч, яруу найрагч Г.Мэнд-Ооёод гардуулжээ. Мөн Францын сенатын гишүүдийн хамтран байгуулсан Европын шинжлэх ухаан, урлаг, эх бичгийн академийг төлөөлж хүрэлцэн ирсэн академич Константин Барбу тус академийн хүндэт гишүүний дипломыг яруу найрагчид олгов. Ташрамд дуулгахад, “Europe” хэвлэлийн газраас “Чингис хаан” одонт, Соёлын гавьяат зүтгэлтэн яруу найрагч Г.Мэнд-Ооёогийн “Хээр талаас бичсэн захидлууд” хэмээх 1192 хуудастай бүтээлийн түүврийг англи, франц, испани, румын хэлнээ эмхэтгэж хэвлэсэн байна.
Бэлтгэсэн Р.Жаргал
