Өнөөдөр гадаа 19 градусын дулаан байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
Долдугаар сарын 28-ны өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 209 дахь өдөр бөгөөд он дуусахад 156 хоног үлдлээ.
- Өнөөдөр Хөвсгөл, Хэнтийн уулархаг нутаг, Туул голын сав газраар үргэлжилсэн бороо, дуу цахилгаантай аадар бороо орох тул болзошгүй үер ус, нөөлөг салхи, мөндөр, аянга цахилгааны аюулаас сэрэмжтэй байхыг анхааруулж байна.
- Билгийн тооллын XVII Жарны "Буян үйлдэгч" хэмээх Усан бар жилийн Зуны дунд улаан морь сарын 30. Бархасвадь гараг. Найралт эх одтой, нэг цагаан мэнгэтэй хар морь өдөр. Өдрийн наран 5 цаг 23 минутад мандан, 20 цаг 34 минутад жаргана. Тухайн өдөр бар жилтнээ аливаа үйлийг хийхэд эерэг сайн ба үхэр, луу, хонь, нохой жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр буян номын үйлийг эхлэх, дээдсээс халамж хүсэх, лам хувраг болох, багш шавьд барилдах, номын абшиг авах, шинэ гэр ба байр авах, угаал үйлдэх, тангараг тавих, гэр бүрэхэд сайн. Хэрүүл тэмцэл хийх, хүүхэд хөлд оруулахад муу. Өдрийн сайн цаг нь үхэр, луу, могой, хонь, нохой, гахай болой. Хол газар яваар одогсод хойшоо мөрөө гаргавал зохистой. Үс шинээр үргээлгэх буюу засуулахад тохиромжгүй бөгөөд эрлэг лугаа учирна хэмээжээ.
- Манай улсын голлох валют болох ам.долларын ханш авах нь 3183.00, зарах нь 3190.00 төгрөгтэй тэнцэж байгаа бол бусад валют болох рубль авах нь 50.80, зарах нь 51.50, харин юань авах нь 472.50, зарах нь 474.00 вон авах нь 2.39, зарах нь 2.41 төгрөг байна.
Өнөөдөр болох онцлох үйл явдлууд:
- 11.30 цагт “Монгол Ньюс” мэдээллийн төвд Дэлхийн хепатитын өдрийг тохиолдуулан “Оном” сангаас хэрэгжүүлж буй ажлууд болон цаг үеийн тулгамдсан асуудлаар мэдээлэл хийнэ.
- 12.00 цагт "Үндэсний мэдээллийн төв"-д: “Тусгаар тогтнол хөдөлгөөн”-өөс хүүхдийн вакцинжуулалт буюу 5-11 насны хүүхдэд ковидын вакцин хийхтэй холбоотойгоор мэдээлэл хийнэ.
Энэ өдөр дэлхийн түүхэнд:
- “Дэлхийн хепатиттай тэмцэх өдөр” тохиож байна.
- 1987 оны энэ өдөр Испанийн хөлбөмбөгчин Pedro мэндэлжээ.
- Харин 1933 оны энэ өдөр сүмогийн 30 дахь ёкозүна III Нишиноүми Кажиро таалал төсчээ.
- 1984 оны Зуны олимп Лос Анжелост нээлтээ хийжээ.
