Архины шалтгаант 1060, хоолны хордлогын 56, бусад ослын 1393 дуудлага бүртгэгдсэн гэв

Баяр наадмын өдрүүдэд 11-11 төвд эрүүл мэндийн салбартай холбоотой нийт 81 өргөдөл, гомдол ирснийг хүлээн авч, шийдвэрлэсэн талаар Эрүүл мэндийн яамнаас дараах мэдээллийг өглөө. Баяр наадмын амралтын өдрүүдэд 1674 эх амаржиж, 1684 хүүхэд төрсөн. Осол гэмтлийн 98 тохиолдлоос 15 зам тээврийн осол, 41  архины шалтгаант хордлогоор, 14 бусад хордлогоор, осол гэмтлийн бусад шалтгаанаар 28 хүн тус тус эндсэн байна. Амбулаторид нийт 61651 үзлэг хийгдсэнээс томуу, амьсгалын замын өвчний 5 хувийг эзэлж байна. Хүлээн авах, яаралтай тусламжийн тасгаар нийт 51614 хүн үйлчлүүлснээс хүүхэд 49.4 хувь, насанд хүрэгчид 50.6 хувийг эзэлж байна. Хөдөө орон нутгаас ирж үйлчлүүлсэн 2489 хүн байна. Эмнэлгийн тусламж, үйлчилгээ аваад буцсан үйлчлүүлэгчид 81.6 хувь, хэвтэн эмчлүүлсэн 18.4 хувь байна. Осол гэмтлийн шалтгаанаар 4992 хүн үйлчлүүлснээс 820 хүн хэвтэн эмчлүүлж, 587 хүн яаралтай мэс засалд орсон байна. 7 сарын 17-ны өдрийн байдлаар эрчимт эмчилгээний тасагт хэвтэн эмчлүүлж байгаа 244 хүн байна. Үүнээс 52 хувь нь насанд хүрэгчид, 48 хувь нь хүүхэд байна. Үүнээс уушгины хатгаагаар эмчлүүлж байгаа 22 өвчтөн байна. Түргэн тусламжийн 22357 дуудлага хүлээн авч үйлчилснээс төрөхийн 551, осол гэмтлийн 2509, хүүхдийн хордлогын 45, халдварт өвчний 6 дуудлага бүртгэгдсэн байна.
 
 
 Баяр наадмын өдрүүдэд мориноос нийт 26 хүүхэд унаж бэртсэн тохиолдол бүртгэгдсэнээс 5 хүүхэд зөөлөн эдийн гэмтэлтэй, 21 хүүхэд гэмтэлгүй байсан байна. Нийт дуудлагын 17858 буюу 80 хувийг насанд хүрэгчдийн түргэн тусламжийн дуудлага эзэлж байна. Насанд хүрэгчдийн дуудлагад архины шалтгаант 1060, хоолны хордлогын 56, бусад ослын 1393 дуудлага бүртгэгдсэн байна. 7 сарын 17-ны өдрийн байдлаар 8129 хүн эмнэлэгт хэвтэн эмчлүүлж байгаагаас 1489 хүн хөдөө орон нутгаас ирж хэвтэн эмчлүүлсэн байна. Дээрх өдрүүдэд нийт 1487 хүнд мэс засал хийгдсэнээс төлөвлөгөөт 436, яаралтай 1051 мэс засал хийгдсэн байна. Засгийн газрын иргэд, олон нийттэй харилцах 11-11 төвд 7 дугаар сарын 01-ээс 20-ны өдрүүдэд иргэдээс ирүүлсэн 81 өргөдөл, гомдолд хариу өгсөн байна. Үүнд гомдол-55, санал-3, хүсэлт-1, талархал-22 ирүүлсэн байна. Гомдлыг агуулгаар нь харахад эмчилгээ үйлчилгээтэй холбоотой-23, эмч, ажилтны харилцаа хандлагатай холбоотой-7, эмнэлэгт цаг авахтай холбоотой-14, бусад-11 байна. Эрүүл мэндийн яамны 323002 дугаарт баяр наадмын өдрүүдээр 2 ээлжээр хариуцлагатай жижүүр томилон ажиллуулж, нийт 133 дуудлага хүлээж авсан. Үүнээс харьяа байгууллагатай холбогдох мэдээлэл авах тухай-93, гомдол-26, асуулт-14 байна.