Увс аймгийн Хяргас сумын харьяат бөх Х.Баянмөнх аварга улсын наадамд 10 түрүүлж, 27 удаа шөвгөрсөн хүчтэн. Мөн чөлөөт бөхийн төрлөөр олимпын мөнгөн медаль хүртсэн, ДАШТ-ий алт, хошой мөнгөн медальтай. Цагийг эзэлсэн их аварга, монгол түмний бахархал болсон хүчтэн, Хөдөлмөрийн баатар, дархан аварга тэрбээр өнөө жилийн улсын наадмын тавын даваанд алдар цолоо дуудуулан, ёслол төгөлдөр зодог тайллаа. Их аваргын цолыг гавьяат жүжигчин, засуул Б.Батболд дуудав. Үүний дараа Х.Баянмөнх аварга төрийн есөн хөлт цагаан тугаа тойрч, адис авлаа.
