Байгаль орчин, аялал жуулчлалын сайд Б.Бат-Эрдэнэ, Дэд сайд Г.Түвдэндорж, Төрийн нарийн бичгийн дарга Э.Баттулга нар энэ онд Монгол Улсыг хоёр удаа тойрон, орон нутгаар ажиллахаар төлөвлөжээ.. Ингэхдээ
- Байгаль орчин, аялал жуулчлалын сайд Б.Бат-Эрдэнэ: Сэлэнгэ, Дархан, Орхон, Төв аймаг, Баянхонгор, Дундговь, Өмнөговь, Говьсүмбэр аймагт
- Байгаль орчин, аялал жуулчлалын Дэд сайд Г.Түвдэндорж: Хөвсгөл, Архангай, Өвөрхангай аймагт
- Байгаль орчин, аялал жуулчлалын яамны ТНБД Э.Баттулга: Хэнтий, Өмнөговь аймагт хуваагдан ажиллах гэнэ. Бусад аймгуудын хуваарийг аймгуудаас ирүүлсэн хүсэлтийн дагуу гаргаж, тухайн орон нутагт ажиллах юм байна.
Эл төлөвлөгөөний дагуу БОАЖ-ын сайд өнгөрсөн өдрүүдэд Сэлэнгэ, Орхон, Дархан-Уул аймагт ажиллажээ.
Сэлэнгэ аймгийнхан 2030 он гэхэд 20 сая мод тарьж ургуулна гэв
Сэлэнгэ аймаг нь “Тэрбум мод” үндэсний хөдөлгөөнийг зохион байгуулах хүрээнд "Тарьц, суулгац нийлүүлэгч аймаг болохын төлөө-Та бид хамтдаа" уриалга дэвшүүлж, “Нэг тэрбум мод- Сэлэнгэ аймагт” зөвлөгөөн зохион байгуулжээ.
Сэлэнгэ аймгийн хэмжээнд 17 сумын 60 иргэн, аж ахуйн нэгж 20 гаруй төрлийн 8 сая ширхэг тарьц, суулгац бойжуулан ургуулдаг. 1973 оноос ойжуулалт нөхөн сэргээлтийн ажлыг тасралтгүй хийсээр ирсэн туршлагатай аймаг. "Тэрбум мод" үндэсний хөдөлгөөн нь мод үржүүлгийн чиглэлээр үйл ажиллагаа эрхэлдэг ААНБ-уудад боломж хэмээн үзсэн. Иймд 2030 он гэхэд 20 сая ширхэг мод тарьж ургуулахаас гадна бусад аймаг орон нутагт “Тарьц, суулгац нийлүүлэгч” аймаг болох зорилтоо БОАЖ-ын сайдад танилцуулсан байна.
Орхон аймгийн газар нутгийн 27.3 хувь нь газрын доройтолд өртсөн байна
Орхон аймгийн газар нутгийн 27.3 хувь нь газрын доройтолд өртсөн. Түүнчлэн хөрсний бохирдлын хувьд цайрын агууламж зарим цэгт зөвшөөрөгдөх дээд хэмжээнээс 1.1-2.4 дахин их байгааг албаныхан онцоллоо. Иймд “Нөхөн сэргээлт-2024” нэгдсэн арга хэмжээтэй уялдуулж, Орхон аймгийн хэмжээнд ойн сан, усан бүхий газарт эвдрэлд орсон талбайг нөхөн сэргээж, ойжуулах нь төрийн бодлогыг уялдуулсан, оновчтой арга хэмжээ авахыг БОАЖ-ын сайд санууллаа.
Орхон аймаг “Ногоон Эрдэнэт" хөтөлбөр хэрэгжүүлнэ. “Ногоон Эрдэнэт” болохын тул 2022 онд Орхон аймгийн Баян-Өндөр, Жаргалант сумдын ИТХ-ын тогтоолоор Баян-Өндөр сумын нутагт 26 га талбайд мод үржүүлгийн газар, 2 га талбайд хүлэмж, Жаргалант сумын нутагт 7 га талбайд мод үржүүлгийн газар шинээр байгуулахаар тогтсон. Орон нутгаас нийгмийн хариуцлагын хүрээнд мод тарьж ургуулах аж ахуйн нэгж байгууллагуудтай хариуцлагын гэрээ байгуулсан. Үүнд:
- “Эрдэнэт Үйлдвэр” ТӨҮГ 10 сая мод
- · “Эрдмин” ХХК 2 сая ширхэг мод
- · “Ачит Ихт” ХХК 3 сая ширхэг мод
- · “Зэс Эрдэнийн хувь” ХХК 1,5 сая ширхэг мод
- · “Ган сэнтий” ХХК 10,000 ширхэг мод тарихаар болсон. Мөн "Мод тарих арга зүй" сургалтад иргэдий хамруулж, гэрчилгээ олгосон юм.
.
Дархан-Уул аймагт "Ногоон Дархан - 2032" хөтөлбөр хэрэгжүүлнэ
Байгаль орчин, аялал жуулчлалын сайд Б.Бат-Эрдэнэ Дархан-Уул аймагт энэ сарын 26-ны өдөр ажиллахдаа ХААИС-ийн харьяа Ургамал газар тариалангийн хүрээлэнгийн Агроэкологи, бизнесийн сургуулийн үйл ажиллагаатай танилцсан. Тус сургууль нь Бүгд Найрамдах Чех улсын патрик технологиор бортоготой тарьц, суулгацыг жилийн дөрвөн улиралд тарьж ургуулдаг. “Тэрбум мод” үндэсний хөдөлгөөнийг Дархан-Уул аймагт хэрэгжүүлэхэд жилд 100 мянган ширхэг шилмүүст модны бортоготой тарьц нийлүүлэх аж.
Мөн аймгийн удирдлагууд, байгаль орчин, аялал жуулчлалын салбарын ажилтан, алба хаагчидтай уулзаж нөхөн сэргээлт, ойн зурвас, ногоон байгууламжийг нэмэгдүүлж, газрын доройтлыг бууруулах замаар иргэдийн амьдрах орчин, нөхцөлийг сайжруулах зорилгоор боловсруулсан “Ногоон Дархан” төсөлтэй танилцлаа.
Тус төслийн хүрээнд аймгийн хэмжээнд 15.7 мянган га талбайд ногоон байгууламж, ойжуулалт, нөхөн сэргээлт хийн, хамгаалалтын зурвас байгуулж, 2030 он хүртэл 20.0 сая мод тарьж ургуулна. Ингэхдээ нарийвчилсан төлөвлөлт гаргасан. Үүнд:
- Аймгийн ойн сан болсон Зулзагын голд 10 сая нарс мод тарих,
- Үлдсэн 10 сая модыг нэг иргэн жилд 10 мод тарих, ингэснээр 2032 оныг дуустал нийт 20 сая мод тарьсан байх юм. Үүнээс
- Шарын гол, Хонгор сумынхан тус бүр 1 сая мод тарих бол Орхон сумынхан 500.000 мод,
- Дархан суманд 11 жилийн хугацаанд 7,5 сая мод тарихаар төлөвлөж, жилд дунджаар 680.000-750.000 мод тарих тооцоо гаргажээ.
