ОХУ-ын Батлан хамгаалах яамнаас жил бүр уламжлал болгон зохион байгуулдаг “Олон улсын цэргийн наадам-2021” цогцолбор тэмцээн удахгүй болно. Үүний хүрээнд “Аравт-2021” морин, “Цэргийн ралли” авто машины уралдаанд оролцох Монгол Улсын Зэвсэгт хүчний баг, тамирчид өнөөдөр ОХУ-ыг зорилоо. “Аравт” олон улсын морин цэргийн уралдааныг Монголд хийхээр төлөвлсөн ч дэлхий нийтэд болон манай улсад цар тахал дэгдсэний улмаас ОХУ-ын Тува улсын нийслэл Кызыл хотноо зохион байгуулах шийдвэр гарсан юм. Иймээс энэхүү тэмцээнд оролцох баг, тамирчид бэлтгэлээ сайтар хангаж, эх орноосоо мордож буй нь энэ. Энэ удаад “Аравт-2021” олон улсын морин цэргийн болон “Цэргийн ралли” цэргийн авто машины уралдаанд оролцох Монгол Улсын Зэвсэгт хүчний баг, тамирчдыг Монголын талын зохион байгуулах хорооны дарга, ЗХЖШ-ын Ажиллагааны удирдлагын газрын дарга, бригадын генерал С.Дашзэвэг ахална. Мөн “Танкийн биатлон” олон улсын тэмцээнд оролцох бүрэлдэхүүнийг ЗХЖШ-ын Материал, техникийн газрын штабын удирдлага, төлөвлөлтийн ахлах мэргэжилтэн, дэд хурандаа Х.Санчирдорж ахалж оролцохоор шийдвэрлэжээ.
Тэмцээнд оролцогч улс орнуудын энх тайван, эв нэгдэл, итгэлцэл, нөхөрлөлийн бэлгэдэл болсон “Олон улсын цэргийн наадам”-ын талаар сонирхуулахад, 2019 онд уг наадам 10 орны нутаг дэвсгэрт явагдаж, түүнд 36 орны 220 гаруй багийн 6000 гаруй цэргийн алба хаагчид оролцсон. Багууд 32 төрлийн уралдаанд мэргэжил, ур чадвараа сорьсон баримт бий. Монгол Улсын Зэвсэгт хүчний цэргийн алба хаагчид энэхүү олон улсын цэргийн наадмын зарим төрөлд буюу “Танкийн биатлон”, “Хээрийн гал тогоо”, “Инженерийн томьёолол”, "Мэргэн буудагчийн зааг” тэмцээнд үндсэн оролцогчоор, “Цэлмэг тэнгэр”, “Артиллерийн галын мастер”, “Аюулгүй орчин” тэмцээнд ажиглагчаар оролцож байлаа. Мөн 2019 онд манай орон анх удаагаа зохион байгуулагч улсын статустайгаар оролцож, “Аравт” олон улсын морин цэргийн уралдааныг өөрийн эх оронд амжилттай зохион байгуулж, өндөр үнэлэлт авч байлаа. Тэрхүү уралдаанд Монгол, ОХУ, Казахстан, Киргиз улсын Зэвсэгт хүчний баг тамирчид өрсөлдөж, БНХАУ, АНУ, Зимбабве, Вьетнам зэрэг орон ажиглагчаар оролцож байсныг та бүхэн санаж буй биз ээ.
