Өнөөдөр ихэнх нутгаар үүлэрхэг, баруун аймгуудын нутгийн зүүн хэсэг, төв болон говийн аймгуудын зарим газар, зүүн аймгуудын нутгийн хойд хэсгээр бороо, нойтон цас орж, цасан шуурга шуурахыг Онцгой байдлын ерөнхий газраас анхаарууллаа. Мөн салхи нутгийн зүүн хэсгээр баруун өмнөөс хойш эргэж, бусад нутгаар баруун хойноос 7-12, говь, тал, хээрийн нутгаар 18-20, зарим үед 24 метрийг давж ширүүсэж, шороон шуурга шуурах гэнэ. Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Байдраг, Тэс голын хөндийгөөр 0-5 градус хүйтэн, Хэнтэйн уулархаг нутаг, Сэлэнгэ, Хараа, Ерөө, Туул, Тэрэлж голын хөндийгөөр 0-5 градус, говийн бүс нутгийн зүүн хэсэг, Дорнод-Монголын тал нутгаар 12-17 градус, бусад нутгаар 3-8 градус дулаан байх аж.
Үүнээс гадна Цаг уур, орчны шинжилгээний газраас Төв аймгийн зүүн, Дундговийн зүүн хойд, Хэнтийн нутгаар цасан шуурга шуурч, Өмнөговь, Дундговийн зүүн хэсэг, Дорноговийн нутаг, Сүхбаатарын өмнөд хэсгээр салхи секундэд 18-20 метр, зарим үед секундэд 24 метрийг давж ширүүсэх учир цаг агаарын гамшигт үзэгдлээс сэрэмжлэхийг анхаарууллаа.
