Хотын стандарт, орчны аюулгүй байдлын хяналт, зохицуулалтын газраас Улаанбаатарыг дэлхийн жишиг, хөгжилд хүрсэн хот болгохоор зорьж буй. Тус газрын дарга С.Төмөрдуламаас зарим зүйлийг тодрууллаа.
-Танай газраас сүүлийн үед ямар ажил хийж байна вэ?
-Нийтийн эзэмшлийн гудамж, зам талбайг хаасан объектын судалгаа гаргаж, орц, гарцыг чөлөөлөх зэргээр иргэдийн эрүүл, аюулгүй орчинд ажиллаж, амьдрах нөхцөлийг сайжруулахаар ажиллаж байгаа. Энэ ажил хоёр сарын хугацаанд системтэйгээр үргэлжилнэ. Газар дээр нь очиж, судалгаа хийнэ. Судалгаагаа нэгтгэн, буулгах шаардлагатай стандартын шаардлагад нийцэхгүй байгаа хашаа, хайсыг тодорхойлно.
-Монгол Улсад хэчнээн стандарт байдаг вэ?
-Монгол Улсад 6390 гаруй хүчин төгөлдөр мөрдөгдөж байгаа стандарт бий. Тухайлбал, сургууль, онцгой объект, эмнэлэг гэх мэт 20 байгууллага л хашаатай байх ёстой. Хашаагаа яаж суурилуулах нь хүртэл стандарттай. Стандартын баримт, бичгийг мөрдөж байж аюулгүй орчинд амьдрах нөхцөл бүрдэнэ. Улаанбаатар хотод төрийн болон хувийн 275 сургууль байна. Үүнээс сургууль, цэцэрлэгийн гадна орчинд баримтлах стандартын 47 шалгуур үзүүлэлт хангасан буюу сагсны талбай, хогийн сав гэх мэт бүрдлийг хангасан сургууль цөөн байна. Нийслэлийн Засаг дарга мөрийн хөтөлбөртөө “Нийгмийн дэд бүтцийн стандартыг хөгжүүлнэ” гэдэг зорилт тавьсан. Хороо, эмнэлгийн гадна орчин ямар байх ёстой, хөгжлийн бэрхшээлтэй иргэдийн зам, шатыг хэрхэн хийх зэрэг нь цогцоороо хотын стандартын баримт бичигт тусгагдсан байгаа.
-Өнгөрсөн жил тоглоомын талбайд хүүхэд бэртсэн хэд хэдэн осол гарсан. Тоглоомын талбайнууд стандартын шаардлага хэр хангаж байгаа вэ?
-1637 гаруй тоглоомын талбайд судалгаа хийсэн. 930 гаруй тоглоомын талбай шаардлага хангахгүй байна. Шаардлага гэж стандартын баримт бичигт тусгасан шалгууруудыг хэлээд байгаа юм. Бид хотын өнгө үзэмж, иргэдийн аюулгүй орчинд амьдрах нөхцөлийг хангахад чиглэсэн баримт бичгүүдийг боловсруулж байна. 22 бүлгийн 97 баримт бичгийг төр, хувийн байгууллагууд болон иргэдэд ойлгуулах чиглэлээр ажиллаж байгаа. Нийслэлийн Засаг даргын захирамжаар иргэдийн аюулгүй орчинд амьдрах нөхцөлийг нэмэгдүүлэхээр ажлын хэсгүүд есөн дүүрэгт ажиллаж байна. Хэсгийн ахлагч нар орчны аюултай байдалд нөлөөлсөн зөрчлүүдийг www.manaikhoroo.mn сайтад оруулдаг. Энэ сайтад явган хүний замын 471 зөрчил бүртгэгдсэн байна. Энэ тоо цаашид ч өснө. Улаанбаатар хотын түгжрэлд ч мөн явган хүний замын зөрчил нөлөөлж байна. Бид ажлаа Нийслэлийн Засаг даргад долоо хоног бүр тайлагнаж, 2021 оны зургадугаар сарын 1-н гэхэд ажлаа бүрэн дуусгана.
