3 дугаар сарын 1-ний өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 60 дахь өдөр бөгөөд он дуусахад 305 хоног үлдлээ.
- Цаг агаар өдөртөө -4 хэмийн хүйтэн бол шөнөдөө -21 градус хүйтэн байх нь ээ.
- Билгийн тооллын 14, есөн улаан мэнгэтэй хар луу өдөр. Өнөөдөр үсээ авахуулах буюу засуулбал эд мал арвижих гэнэ. Энэ өдөр хулгана, бич жилтнээ аливаа үйлийг хийхэд эерэг сайн, үхэр, луу, хонь, нохой жилтнээ сөрөг муу нөлөөтэй тул аливаа үйлийг хийхдээ анхаарал болгоомжтой байхыг од эрхэс сануулж байна
- Манай улсын голлох валют болох ам.долларын ханш 2395.00 төгрөгтэй тэнцэж байгаа бол бусад валют болох рубль 43.00, юань 379.50, вон 2.20 төгрөг байна.
Өнөөдөр болох онцлох үйл явдлууд:
- Өндөр гэгээний их дүйчэн өдөр, түмэн олонд зориулсан шинэ жилийн засал, Тэргүүн их хамба лам Д.Чойжамцын номын айлдвар, Хансүр гавж Ё.Амгалангийн Цагаан Дарь- Эх бурханы насны авшиг хайрлах номын үйл ажиллагаа 10.00 цагт Буянт- Ухаа спорт цогцолборт болно.
- 09.00 цагт Интермед эмнэлгийн хурлын танхимд Зоонозын өвчин судлалын байгууллагуудын удирдах ажилтнуудын зөвлөгөөн болно.
- “Бичил уурхайн Мэдлэгийн төв”-ийн цахим платформын нээлтийн ажиллагааг Холидэй Инн зочид буудалд 10.00 цагаас зохион байгуулна.
- "Зууны мэдээ" сонины Үндэсний мэдээллийн төвд 11.30 цагаас "Иргэдийн шударга шүүх" ТББ-ын дэргэдэх "Ээжүүдийн холбоо", "Монголын худалдаачдын холбоо" хамтран "Бидэнд баярлах шалтгаан алга-2" цуглааны талаар мэдээлэл хийхээр хэвлэлийн бага хурал зарлалаа.
- Турк улсын Истанбул хотноо зохиогдсон 16 дахь удаагийн олон улсын тогооч нарын их наадамд амжилттай оролцсон тогооч нар 09.00 цагаас Чингис хаан олон улсын нисэх онгоцны буудалд бууна.
Энэ өдөр дэлхийн түүхэнд:
- 293 онд Ромын эзэнт гүрний удирдагч Диоклетиан Максимиан болон Константиус Хлорус, Галериус нарын эрх хэмжээг хүлээн зөвшөөрч "Ертөнцийн дөрвөн удирдагч" гэх ойлголт эхэлжээ.
- 1562 онд Францын Васси тосгонд Калвинист урсгалын 63 дагагчийг хороосноор Францад шашны ариун дайн дэгджээ.
- 1565 онд Бразилийн Рио де Жанейро хот байгуулагдав.
- 1642 онд одоогийн Массачусетс мужид Жоржиана тосгон байгуулагджээ. Ингэснээр АНУ-д албан ёсоор байгуулагдсан анхны тосгон болсон байна.
- 1781 онд Эх газрын конгресс хуралдаж Эх газрын Америкийн хуулийг албан ёсоор баталсан байна.
- 1790 онд АНУ-д хүн амын тооллого анх удаа болжээ.
- 1811 онд Египетийн Мамлюкийн угсааны бүх удирдагчдийг хороосноор тус улсад Мухаммад Алигийн хаанчлал эхэлсэн байна.
- 1815 онд Францын эзэн хаан Наполеон 100 хоногийн турш Элба аралд цөлөгдсөний эцэст Францдаа эргэн иржээ.
- 1872 онд Yellowstone-ыг үндэсний цэцэрлэгт хүрээлэн болгосноор дэлхийн хамгийн анхны цэцэрлэгт хүрээлэн болжээ.
- 1910 онд АНУ-ын түүхэн дэх хамгийн хөнөөлтэй цасан уруй болов. Вашингтон мужийн Кинг тойрогт зорчиж явсан Great Northern Railway компанийн галт тэрэг цасан уруйд дарагдаж 96 хүн амиа алджээ.
- 1947 онд Олон улсын валютын сан (ОУВС) санхүүгийн үйл ажиллагаагаа явуулж эхэлжээ.
