Хөл бөмбөгийн эмэгтэйчүүдийн шигшээ багийн Азийн АШТ-ий финалын тоглолтыг Австрали улсад ирэх жил зохион байгуулна. Тус тэмцээний урьдчилсан шатны тоглолтын сугалаа өнгөрсөн долоо хоногт болсон. Манай эмэгтэй тамирчид зургаадугаар сарын 23-наас долоодугаар сарын 5 хүртэл үргэлжлэх эхний шатны тэмцээнд Тайланд, Энэтхэг, Зүүн Тимор, Иракийн шигшээ багтай тоглохоор учраа таарчээ.
Хөл бөмбөгтэй холбоотой өөр нэгэн мэдээ дуулгахад, Монгол Улсын Засгийн газраас хэрэгжүүлсэн “Go Mongolia” төслийн хүрээнд зохион байгуулсан сургалтаас шалгарсан шилдэг 11 хүүхэд Английг зорилоо. Тэд дээрх хөтөлбөрийн хүрээнд “Craven cottage” цэнгэлдэх болон I зэрэглэлийн бэлтгэлийн баазтай танилцаж, “Фулхэм” клубийн дэргэдэх хөл бөмбөгийн академийн дасгалжуулагч нартай хоёр өдөр албан ёсны бэлтгэл хийж, тус клубийн дэргэдэх сангийн багтай нөхөрсөг тоглолт өрнүүлэх аж.
