Швейцарь улсын Сант Морицд хотод болсон снөүбоард, фрийстайл, чөлөөт цанын ДАШТ-д Үндэсний шигшээ багийн тамирчин Г.Ганзориг дасгалжуулагч Г.Баттулгын удирдлагад улсаа төлөөлж өрсөлдлөө. Түүний оролцсон параллель слалом, параллель жиант слалом төрөлд 23 орны 58 шилдэг тамирчин ур чадвараа сорив.
Азийн орнуудаас Японы тамирчин Мики Цүбаки түрүүлж алт, мөнгө, БНСУ-ын тамирчин Ли Сангхо хүрэл медаль хүртсэн. Снөүбоардоор тивийн орнуудын тамирчид хичээллэдэг ч өмнө нь ДАШТ-д ийм өндөр амжилт гаргаж байгаагүй юм. Энэ удаа Азийнхны хувьд түүхэн амжилт боллоо хэмээн дээрх тэмцээнийг зохион байгуулагчид онцолжээ. Шилдгүүдтэй өрсөлдсөн Г.Ганзоригийн FIS онооны үзүүлэлт дэлхийн аваргын чансаанд тэнцсэнээр Австри улсын иргэн, снөүбоардын спортын Европын төлөөлөл, АНУ-ын шигшээ багийн дасгалжуулагч Ричард Пиклийн нүдэнд өртөж, түүний удирдлагад бэлтгэл сургуулилалт хийхээр болжээ.
