Зургаан настай хүүхдүүдийн дунд бие бялдар, нийгэмших хандлага, сэтгэлгээ, танин мэдэхүйн чиглэлээр хийсэн үнэлгээгээр Багануур дүүрэг улсын хэмжээнд бүх төрлөөр тэргүүлжээ. Бие бялдрын түвшин тогтоох үзлэгээр Багануурынхан 77.8 оноо (улсын дундаж 74.8) авсан бол нийгэмших хандлага, сэтгэлгээний түвшингээр тус дүүргийн хүүхдүүд 74.9 (улсын дундаж 70.3), танин мэдэхүйн чиглэлийн үнэлгээгээр 72.1 оноо (улсын дундаж 67.7) авчээ. Ерөнхий боловсролын сургуулийн нэгдүгээр ангид шинээр элсэн суралцах хүүхдүүдийн сэтгэлгээ, хөгжлийн онцлог, ялгаатай байдал болоод тэдний эзэмшсэн мэдлэг чадвар, дадлыг илрүүлэхээс гадна цэцэрлэгийн сургалтын хөтөлбөрийн үр дүн, хэрэгжилтийг тандан судлах зорилготой энэхүү үнэлгээг Боловсролын яамны хамтарсан төслийн хүрээнд улсын хэмжээнд нийт 72 мянга гаруй зургаан настныг хамруулан хийсэн байна.
Л.Ням
