“Хангарьд” клубийн шайбтай хоккейн 12 хүртэлх насныхны багийн ахлагч О.Сумъяабазар энэ спортоор багаасаа хичээллэсэн тамирчдын нэг. Тус клубт хөл тавьсан даруйдаа томоохон тэмцээнүүдэд амжилттай тоглож, багаа хожилд нэг бус удаа хөтлөхийг дасгалжуулагч багш нь хараад бахархсан гэдэг. Өсвөр үеийнхний УАШТ, клубүүдийн болон цомын АШТ, Монголын хүүхдийн өвлийн спортын VIII наадамд нөхдөө ахлан оролцож, эхний гурван байрт шалгаран медаль хүртэхэд түүний ур чадвар багагүй нөлөөлжээ. Энэ удаа “Шинэ танил” буланд “Орхон” аймгийн IV сургуулийн 6a ангийн сурагч О.Сумъяабазарыг онцоллоо.
-Хоккейгоор хичээллэхийг танд хэн анх санал болгож, мөсөн талбайд авчрав?
-Намайг энэ спортод дуртай болгосон хүн бол Дархан-Уул аймгийн “Шарын гол” багийн тамирчин Түвшинбаяр ах. Тэрбээр нэг өдөр “Хоккей тоглох их гоё. Чи хичээллээч. Сонирхолтой санагдана даа” гэв. Мөсөн талбайд бэлтгэл хийж үзтэл бүр ч их таалагдлаа. Тууштай хичээллэх шийдвэр гаргахад аав, ээж минь дуртай хүлээж авсан. Хоккейд ид татагддаг байхдаа “Хичээл хурдан тараасай. Бэлтгэлээ хийх юм сан” гэж яардаг сан. Би “Хангарьд” багийн ахлагч. Ангийнхаа нөхдөөс ганцаараа хоккей тоглодог болохоор сургуулийн багш нар дэмжээд тэмцээнд оролцуулдаг. Намайг ямар ч тэмцээнд оролцоход манайхан ирж үздэг. Хүүхдийн өвлийн спортын VIII наадмын хоккейн тэмцээн Чингэлтэй дүүргийн мөсөн талбайд болоход аав бидэнтэй хамт Улаанбаатарт ирж, тоглолт өндөрлөтөл байсан. Аавыг байхад би сандарч догдлохгүй, тайван тоглосон.
-12 насныхны ангилалд Багануур дүүргийн “Billy the goat”, Хан-Уул дүүргийн “Мэргэн академи”-ийн тоглогчид хамгийн хүчтэй өрсөлдөж харагдсан шүү.
-Бид хагас шигшээд “Billy the goat” багийнханд 7:1-ээр хожигдсон ч хүрэл медалийн төлөө өрсөлдөхөөр шалгарсан. Дасгалжуулагч Б.Зоригт багшийн зөвлөснөөр амжилттай тоглож, аймагтаа медальтай очсон. Миний хувьд багийнхантайгаа энэ жил УАШТ, клубуудын болон О.СУМЪЯАБАЗАР: Багийнхантайгаа өвлийн олимпын аварга болохыг мөрөөддөг цомын АШТ-д оролцож түрүүллээ. Сүхбаатар аймагт болсон цомын АШТ-д бид аваргын төлөө тамирчдыг нь 3:2-оор хожиж, алтан цом гардсан шүү. Надад одоо 15 медаль бий. Үүнээс зургаан нь алт. Өсвөр үеийнхний УАШТ, Хүүхдийн өвлийн спортын наадмаас хүртсэн медалиа шагналынхаа хамгийн дээр залсан.
-Үзэгчид тэмцээний үед таныг онцлоод “Найм дугаартай тоглогч хурдтай, сэргэлэн, мэдрэмжтэй хүүхэд байна” гээд ярихыг нь сонсож суулаа.
-Гадаадын шилдэг багуудаас найм дугаартай тамирчин нь хоккейн ДАШТ-д амжилт гаргахыг зурагтаар цөөнгүй харсан тул энэ дугаарыг сонгосон юм. Насанд хүрэгчдийн лигт оролцдог “Хангарьд” клубийн залуучуудын багийн тоглогч А.Билгүүн ах, мөн улсын шигшээ багийн тамирчин Б.Энхбат ах найм дугаартай тоглодог. Би өмнө нь дөрөв дугаартай тоглодог байхдаа алт, мөнгөн медаль хүртсэн. Манай ангийн багш, хамт олон намайг тэмцээнд оролцохын өмнө “Сайн тоглож, багаараа аварга болоорой” гээд амжилт хүсдэг. Медаль хүртээд ирэхэд баяр хүргэж, угтдаг юм.
-Хоккейн тэмцээн өрсөлдөөнтэй, бас зодоонтой болдог тул тамирчид бэртэл авах нь цөөнгүй. Тоглолтын үед Б.Зоригт багш таныг хараад сэтгэл нь зовниж зогссон.
-Хүүхдийн өвлийн спортын VIII наадмын тэмцээнд оролцож байхад хөл хөндүүрлээд санасандаа хүртэл тоглоогүй. Багшдаа багагүй зэмлүүлсэн, багийнхандаа ч шүүмжлүүлсэн. Тэр үед надаас л болж нөхөд минь хожигдлоо гэж сэтгэлээр унасан. Гэхдээ хүрэл медалийн төлөө “Аав минь надтай хамт энд байгаа шүү дээ” гэж бодоод өөрийгөө зоригжуулж сайн тоглосон. Талбайд гарахад багш “Байраа зөв барьж урагшил. Эсрэг багийнхны захаар нь довтлоорой” гэж зөвлөсөн. Би ч хэлснийг нь хэрэгжүүлсэн шүү.
-Тамирчин хүн сайн өрсөлдөгчтэй байж өөрийгөө хөгжүүлдэг. Эсрэг багийнхнаас суралцах зүйл их байв уу?
-Тийм ээ. Өөрийгөө өрсөлдөгчийнхөө хэмжээнд хүртэл хөгжүүлэх хэрэгтэй гэж боддог. Багануур дүүргийн 12, 16 насныхны баг сайн тоглодог болохоор сурах зүйл их харагдсан. Аав тэмцээний өмнө “Тайван тоглоорой, шатаж болохгүй шүү. Тоглолтын үед хямарч, багийнхандаа муухай зан гаргуузай” гэж хэлдэг. Өвлийн хүйтэнд гадаа бэлтгэл хийх амаргүй ч шантрах бодол төрдөггүй. Харин ч хөлсөө гартал тоглох сайхан санагддаг. Бид клубийнхээ ах нарын ур чадвараар бахархах дуртай. Тэднээс залуучуудын багт тоглодог А.Билгүүн (Том), Э.Билгүүн (Жижиг), насанд хүрэгчдийн шигшээ багаас Б.Цэрэнбалжир ахын тоглохыг сонирхож хардаг. Би багийнхантайгаа өвлийн олимпын аварга болохыг мөрөөддөг. Хожсон үедээ дараагийн тэмцээнд аваргаа хамгаална, ялагдсан үед тэмцээн нэгээр дуусахгүй, ялах боломж ирж л таараа гэж боддог юм.
