Америкийн жүжигчин Жорж Клуни Ерөнхийлөгч Барак Обамагийн сонгуулийн кампанит ажлыг дэмжин, хандивын зоог барих гэнэ. Өнөөдөр хандивын зоогийн тасалбар 150-иас 40 мянган ам.долларын үнэтэй байсан ч нүд ирмэх зуур борлогдсон аж.
Орос гаралтай америк зураач Марк Роткогийн “Шаргал, улаан, шар” зургийг “Christie’s” дуудлагаар худалджээ. Орчин үеийн урлагийн ертөнцөд дуулиан тарьсан хэмээгддэг энэ бүтээлийг нэрээ нууцалсан хүн 86.9 сая ам.доллараар худалдан авсан байна.
Филиппинийн өмнөд хэсэгт орших Бутуан хотын нэгэн дэлгүүрт түймэр гарсны улмаас 17 хүн амиа алдсан тухай АР уламжиллаа. Хотын цагдаагийн газрын дарга Педро Обальдогийн хэлснээр амь үрэгдэгсдийн дийлэнх нь дэлгүүрийн ажилтнууд байсан аж. Дэлгүүрийн гурван давхар барилгыг нийтэд нь хамарсан түймрийг унтраахын тулд гал сөнөөгчид таван цаг ажилласан байна.
