Монгол жааз хөгжмийн урлагт өөрийн өнгө төрхөөрөө танигдан гарч ирсэн чадварлаг дуучин Ц.Хулан энэ сарын 16-нд уран бүтээлийн бие даасан тоглолтоо хийх гэж байна. “Улаанбаатар” зочид буудлын эвент холлд өөрийн нэрээр нэрлэсэн Khulan jazz concert-ын бэлтгэл бүрэн хангагджээ.
Энэ үдэш дуучин "жазз Хулан" өөрийн урын сан дах Монгол хит дуунууд, дэлхийн сонгодог жазз дуунуудыг мэргэжлийн шилдэг хөгжимчдийн хамт толилуулна. Тодруулбал, нэгэн үдшийг жазз хөгжмийн аялгуу сонсож, аз жаргалтай өнгөрүүлэх боломжийг олгох дээрх тоглолтыг хөгжмийн зохиолч, продюсер Б.Наранзун хөтөлж, “THE HU” хамтлагийн үүсгэн байгуулагч Монгол Улсын Гавьяат жүжигчин, дуучин, продюсер, Б.Дашдондог, “Инээмсэглэл” хамтлагийн дуучин, Монгол Улсын Гавьяат жүжигчин, дуучин Н.Ганхуяг, “Шар айраг” хамтлагийн дуучин Буянаа /СТА дуучин Буянтогтох/ болон Улсын филармонийн гоцлол дуучин Наагий /дуучин Н.Наранбаатар/ нар хамтран ая дуугаа өргөх аж.
Тоглолт хоёр хэсгээс бүрдэх бөгөөд эхний хэсэгт дэлхийн шилдэг классик жааз бүтээлүүд, хоёр дахь хэсэгт дуучин Ц.Хулангийн зүрх сэтгэлд хоногшсон дуунууд болон дуэтүүдийг шинэчилсэн найруулгаар сонордуулах юм байна. Тоглолтын тасалбар Ticket.mn худалдаалагдаж байна.
