Ub.life сайт, “Fat cat” жазз клуб хамтран Ардын жүжигчин Г.Түмэндэмбэрэл агсны амьдрал, уран бүтээлийн түүх, замналыг олон нийтэд таниулах “Туулын урсгал шөнөдөө сайхан” арга хэмжээг өчигдөр зохион байгууллаа. Тус байгууллагынхан “Яруу найргийн үдэш” нэртэй үйл ажиллагааг цувралаар зохион байгуулж, урлаг, утга зохиолын салбарынхныг “цуглуулдаг” болоод удаж буй.
Тэгвэл энэ удаа уянгалаг хоолой, өвөрмөц дуулалтаараа олны хайр хүндлэлийг хүлээсэн авьяаслаг дуучны амьдрал, уран бүтээлийн түүхийг өнөө цагийнханд хүргэхийг зорьжээ. “Тагтаа паблишинг” хэвлэлийн газрын үүсгэн байгуулагч Б.Баясгалан, жүжигчин, нэвтрүүлэгч Э.Уянга, Ub.life сайтын сэтгүүлч Б.Энхцэцэг болон дуучны бага охин Хулан нар уг арга хэмжээнд оролцож, сонирхолтой яриа дэлгэн, олны дунд алдаршин түгсэн дууных нь шүлгүүдийг уншиж сонордуулсан байна.
