Олон нийтэд урлагийн боловсрол олгох чиглэлээр сургалт, үзвэр үйлчилгээ, тоглолт, бусад төсөл, хөтөлбөр, арга хэмжээг зохион байгуулах, нийгэмд үйлчлэх зорилгоор уран бүтээлчид хамтран “Урлагийн хөгжил ирээдүй” ТББ байгуулсан. Тус байгууллага утга зохиол, дүрслэх урлаг, хөгжим, тайз, дэлгэцийн урлагийн төрлүүдээр цуврал лекц, сургалтыг долоо хоног бүр зохион байгуулахын зэрэгцээ “Bee studio” урландаа уран зургийн болон жүжгийн зохиолчийн сургалт хичээллүүлж буй. Түүнчлэн “Bee theatre” байгуулж, бэсрэг жүжгүүд, тоглолт хүргэж эхэлсэн. Тухайлбал, нэгдүгээр сард театрынхаа анхны уран бүтээл болгон зохиолч П.Баярсайханы “Хүн гөрөөс” жүжгийг Ардын жүжигчин Б.Мөнхдоржийн найруулснаар үзэгчдэд хүргэсэн бол өнгөрсөн сард Н.Болороогийн “Тусгал” жүжгийг Т.Цэнд-Аюушийн найруулгаар толилуулсан юм. Тэгвэл энэ сард “Миний ертөнцөөр” хүүхдийн гар зургийн сургалт зохион байгуулахаар болжээ. Эл сургалт нь хүүхдийн сэтгэхүйг урлагийн мэдрэмжид нь суурилан хөгжүүлэх зорилготой бөгөөд тэдний нас, сэтгэхүйд тохирсон хичээлүүд заах аж. Сурагчдыг энэ сарын 21-нийг дуустал “Bee” театрын байранд бүртгэнэ.
Бэлтгэсэн А.Хангал
