Хөгжлийн бэрхшээлтэй иргэдийн дунд “Монгол Абилимп–2022” мэргэжлийн ур чадварын анхдугаар уралдааныг Монгол Улсын Ерөнхий сайдын ивээл дор өнөөдөр зохион байгуулж байна. Уралдаанд хөгжлийн бэрхшээлтэй 18-аас дээш насны иргэд бэйкэри, тогооч, массаж, маникюр, үсчин, оёдол, word боловсруулалт, цэцэрлэгжүүлэлт, вэб хуудас хийх, постер загвар хийх, модон сийлбэр, уран хатгамал, мужаан зэрэг 13 мэргэжлийн төрлөөр оролцож байна.
Уралдааныг Ерөнхий сайдын Нийгмийн хамгаалал, хөгжлийн асуудал хариуцсан зөвлөх Ч.Ундрахбаяр, Хөдөлмөр, нийгмийн хамгааллын дэд сайд С.Зулпхар нээсэн юм. Энэ үеэр Монгол Улсын Засгийн газар болоод Хөдөлмөр, нийгмийн хамгааллын яамнаас авч хэрэгжүүлж буй бодлого, арга хэмжээний талаар товч дурдаад анх удаа зохион байгуулж буй “Монгол Абилимп–2022” мэргэжлийн ур чадварын уралдаанд оролцогчдод амжилт хүслээ. Мөн тэмцээнд оролцож байгаа нь бусдад урам, зориг өгч Хөгжлийн бэрхшээлтэй иргэдийн хөдөлмөр эрхлэх ур чадвар ямар өндөр түвшинд байгааг харуулж буй үлгэр дуурайлал, уриа болж буйг онцоллоо.
Мөн Монгол Улсын Абилимпийн холбооны ерөнхийлөгч Т.Цэдэнбал үг хэлж Олон Улсын Абилимпийн холбооны ерөнхийлөгч Мурата Юкагийн мэндчилгээг дамжуулсан юм. Хөгжлийн бэрхшээлтэй иргэдийн мэргэжлийн ур чадварыг олон нийтэд сурталчлан таниулах авхаалж самбаа сорьсон “Монгол Абилимп-2022” улсын анхдугаар уралдааныг үндэсний хэмжээнд нээлттэй зохион байгуулж байгаа юм. Уралдаанд 13 төрлийн мэргэжлээр тус бүр эхний хоёр байрыг шалгаруулж, 1 дүгээр байрт шалгарсан оролцогчдод олон улсын ур чадварын уралдаанд оролцох эрх олгоно.
Зохион байгуулагчаар Хөдөлмөр, нийгмийн хамгааллын яам, Хөгжлийн бэрхшээлтэй хүний хөгжлийн ерөнхий газар, Сэргээн засалт, сургалт, үйлдвэрлэлийн төв, Абилимпийн холбоо, Мэргэжлийн боловсрол, сургалтын үнэлгээ, мэдээлэл арга зүйн төв хамтран ажиллаж байгаа юм. Олон улсад мэргэжилтэй ажилчдын олимп хэмээн хүлээн зөвшөөрөгдсөн Дэлхийн ур чадварын тэмцээнд Монгол Улс 2015 онд анх удаа оролцож, мэргэжлийн боловсрол, сургалтын байгууллагад сурч мэргэжил эзэмшиж буй монгол залуус дэлхийд ур чадвараа үнэлүүлж ирсэн.
Харин 2016 онд Олон улсын Абилимп буюу хөгжлийн бэршээлтэй иргэдийн мэргэжлийн ур чадварын тэмцээнд монголчууд анх удаа оролцсон. Франц улсын Бордо хотноо болсон, дэлхийд хүлээн зөвшөөрөгдсөн нэр хүндтэй тэрхүү тэмцээнд анх удаа оролцсон Монголын баг 11 мэргэжлээр оролцон 3 мөнгөн медаль, 1 тусгай байрын шагнал хүртэж байсан. Харин өнөөдөр бид эх орондоо “МОНГОЛ АБИЛИМП-2022” мэргэжлийн ур чадварын анхдугаар уралдаанаа зохион байгуулж байна. Абилимп мэргэжлийн ур чадварын уралдаан нь хөгжлийн бэрхшээлтэй хүний чадвар, чадамж, ур чадварыг өндрөөр үнэлж, тэдний хөдөлмөр эрхлэх, мэргэжил эзэмших боломжийг нээж, олон нийтийн ойлголт, хандлагыг дээшлүүлэхэд ихээхэн ач холбогдолтой юм.
