АНУ-ын Цахиурын хөндийн амьд домог гэгддэг Стив Жобс “Apple” компанийн ерөнхий захирлын үүрэгт ажлаа хүлээлгэн өгсөн тухай “Ройтерс” мэдээлэв. Тус компанийн үйл ажиллагаа хариуцсан захирал Тим Кук түүний халааг авчээ. “Компанийн захирлын үүргийг гүйцэтгэж чадахаа болих цагт энэ тухай хамгийн түрүүнд та бүхэнд мэдэгдэнэ гэж би амласан.
Энэ үгийг хэлэх өдөр өнөөдөр тохиож байна” хэмээн тэрбээр Захирлуудын зөвлөлд илгээсэн захидалдаа өгүүлсэн байна. Тус компанийг үүсгэн байгуулалцсан тэрбээр ерөнхий захирал бус өөр албан тушаалд ажиллах хүсэлтэйгээ мөн илэрхийлсэн аж. 2004 онд хорт хавдар туссан учир биеийн байдал муу, эмчилгээ хийлгэж байгаа хэмээн тэрбээр чөлөө авсан юм. “Forbes” сэтгүүлд 2009 онд мэдээлснээр Стив Жобс 5.1 тэрбум ам.долларын хөрөнгөтэй байжээ.
