Хилийн 0306 дугаар ангийн хамт олон хилчдийнхээ ая тухай амьдрах орчныг бүрдүүлжээ. Өөрөөр хэлбэл, Хил хамгаалах байгууллагаас 2021 онд дэвшүүлсэн “Хилчдийн хөгжлийн орчинг сайжруулах” зорилт, “Хилчдийн нийгмийн хамгаалал-2024” хөтөлбөрийн хүрээнд “8 айлын орон сууц”-ыг барьж ашиглалтад орууллаа. Уг орон сууц нь дулааны болон бохирын шугамд бүрэн холбогдсон учир тав тухтай, аюулгүй, тохилог орчинд амьдрах таатай нөхцөл бүрдсэн аж. Улмаар өнөөдөр алба хаагчид шинэ тохилог гэртээ нүүн орсон гэнэ.
Ташрамд дурдахад, төв суурийн газраас алслагдмал Мэнэнгийн отряд саяхан дэргэдээ бага сургуультай болсон. Тус бага сургууль нь 1-5 дугаар ангийн 50 хүүхэд хүлээн авах хүчин чадалтай. Энэ жил тус бага сургуульд хоёр багш ажиллаж, 17 хүүхэд суралцаж буй. Ийнхүү Мэнэнгийн отрядынхан эх орон, ард түмнийхээ өмнө хүлээсээн үүргээ биелүүлэхээс гадна өөрсдийн нөөц бололцоонд тулгуурлан бүтээн байгуулалт өрнүүлж, буйдхан орших отрядаа хөгжүүлсээр байна.
