Цаг уурын байгууллагын ирүүлсэн мэдээгээр энэ амралтын өдрүүдээр буюу маргааш баруун аймгуудын нутгаар, нөгөөдөр баруун болон төвийн аймгуудын нутаг, говийн аймгуудын хойд хэсгээр, энэ сарын 15-нд нутгийн зүүн хагаст цас орох төлөвтэй байна. Улмаар салхины хурд 18-20, зарим үед 28 метр секунд хүртэл ширүүсэж, хүчтэй цасан болон шороон шуурга болно. Түүгээр зогсохгүй 14-нд баруун болон төвийн аймгуудын нутгаар, 15-нд ихэнх нутгаар эрс хүйтрэх төлөв гарчээ.
Иймд:
-Цаг агаарын мэдээ, мэдээллийг цаг тухай бүр сонсон, мэргэжлийн байгууллагаас өгч буй сэрэмжлүүлэг, анхааруулгыг дагах,
-Тээврийн хэрэгслийн жолооч нар хол, ойрын замд гарахдаа тээврийн хэрэгслийн найдвартай байдлыг хангаж бензин, шатахууны нөөцтэй, дулаан хувцастай зорчих,
-Иргэд, малчид болзошгүй эрсдэлээс урьдчилан сэргийлж, салхи шуурганд төөрөх, малтайгаа уруудах эрсдэлээс урьдчилан сэргийлж, малаа ойрын бэлчээрт хариулах, бага насны хүүхдийг малд явуулахгүй байхыг холбогдох байгууллагаас анхааруулж байна.
