Говь-Алтай аймгийн Шарга сумын Сондуулт багийн Улаан тээг гэх газарт авто осол гарч, 11 иргэн хүнд, хөнгөн гэмтэл авлаа. Мөн хоёр хүн газар дээрээ нас барсан гэнэ. Ховд аймгийн Жаргалант сумаас Улаанбаатар хотын чиглэлд, иргэн Б-гийн жолоодож явсан “Грандбирд” загварын том оврын автобус, Говь-Алтай аймгийн Есөнбулаг сумаас Баян-Өлгий аймгийн чиглэлд иргэн Б-гийн жолоодож явсан “Кроун” загварын суудлын автомашинтай мөргөлдсөнөөс дээрх ноцтой осол гарчээ. Цагдаагийн байгууллагаас бэртэж гэмтсэн 11 хүнийг эмнэлгийн байгууллагад хүргэж өгсөн байна. Орон нутгийн цагдаагийн байгууллага авто ослыг шалгаж байна.
