Ж.Батзандан: Манай нам бусад сөрөг хүчний намуудтай нэгдэж сонгуульд оролцоно

Шударга иргэдийн нэгдсэн эвсэл намаас цаг үеийн асуудлаар мэдээлэл хийлээ. 

ШИНЭ намын дарга Ж.Батзандан: УИХ-ын сонгуулиас хойш 100 хоног өнгөрлөө. Энэ хугацаанд сөрөг хүчнүүдийн үйл ажиллагаа эрчимжих цаг болсон. 

Улсын 4 дэх хүчирхэг нам бол ШИНЭ нам болох нь тодорхой харагдаж байна. Эрх баригч нам нийт сонгогчдын 46 хувийн саналыг авсан. Бусад нам нь нийт сонгогчдын 50 гаруй хувийг авсан. Манай нам нийт сонгогчдоос 300 мянган хүний санал авсан байна. Орон нутгийн сонгуульд ШИНЭ нам сөрөг хүчний намуудтай нэгдэж, 125 хүнийг нийслэл, дүүрэг, сум, хороодод нэр дэвшүүлсэн. 

АН-тай нэгдэх, нийлэх асуудал яригдаагүй. АН-тай нэгдэхийн тулд яарах сандрах шаардлагагүй гэж бид үзэж байгаа. Л.Болд бол ШИНЭ намын нэг гишүүн, Төв зөвлөлийн дарга. Л.Болд гэдэг хүний санал бол нэг гишүүний санал гэсэн үг. ШИНЭ намын Төв зөвлөл 333 гишүүнтэй, Их хурал 1300 гишүүнтэй. УИХ-ын сонгуулиар 300 мянган хүн бидний төлөө саналаа өгсөн. Шударга ёсны тэмцлийг дэмжиж санал өгсөн. Сөрөг хүчин хамтарч ажиллах нь зүй ёсны хэрэг. Үнэмлэхүй эрх баригчдыг хязгаарлах нь сөрөг хүчний ажил. Түүнээс биш өвөр түрийндээ яаран орох шаардлагагүй гэж бид үзэж байгаа. Тэр утгаараа АН, МАХН-аас нэр дэвшиж байгаа шударга нэр дэвшигчдийг бүгдийг нь дэмжиж ажиллана.
УИХ-ын сонгууль луйврын сонгууль болсон. Монголын ард түмнийг луйвардсан. Бид холбогдох байгууллагуудад нь гомдол өгсөн боловч үүнийг шалгахгүй байна" гэлээ.