Хөл бөмбөгийн холбооны санхүүжилтийг ил тод болгохыг шаардлаа

Монголын хөл бөмбөгийн холбооны сан­хүүжилт, түүний зарцуулалтын мэдээл­лийг ил тод болгохыг шаардлаа. Өнгөрсөн до­лоо хоногийн баасан гарагт дээрх холбооны ээл­жит бус хурлын үеэр гишүүд нь болон та­мирчид ийнхүү эсэргүүцлээ илэрхийлсэн юм. Холбооны гишүүдийн хэлснээр Олон улсын хөл бөмбөгийн холбоо буюу FIFA-гаас олгосон тө­сөл, хөтөлбөрийн санхүүжилт хэрхэн зар­цуулсан нь тодорхойгүйгээр алга болдог гэнэ. Олон улсын хөл бөмбөгийн холбооноос ги­шүүн орнууддаа жилд дунджаар 500 мянган ам.долларын санхүүжилт олгодог юм байна. 
Гишүүдийн тавьсан шаардлагын дагуу хөл бөм­бөгийн хөгжлийг дэмжих төсөл, хөтөл­бөрийн санхүүжилтийг шалгах түр хороог бай­гуулжээ. Энэхүү түр хороог холбооны дэд ерөн­хийлөгч И.Сарангэрэлээр ахлуулж, М.Баяр­магнай, Д.Нанжид, Б.Болдбаатар, М.Ганбаатар нарын гишүүн багтсан аж. Тэд үйл ажиллагааны тайланг судалж, дүгнэлт боловсруулж, зөв­лөлийн ээлжит хуралд танилцуулах гэнэ. Гэвч санхүүгийн хяналт шалгалтыг холбооны Удир­дах зөвлөлийнхөнд даалгасан нь зөв гарц биш хэмээн гишүүд нь үзэж буй гэнэ. Түүнчлэн Удир­дах зөвлөлийн гишүүдэд шаард­лага тавь­сан хэд хэдэн гишүүнийг ажлаас нь тухайн өдөр чөлөөлжээ. 
Мөн Хөл бөмбөгийн холбооны бэлтгэлийн төв байрыг зориулалтын бусаар ашиглаж бай­гааг тамирчид шүүмжилсэн юм. Энэ та­лаар хөл бөмбөгийн үндэсний шигшээ багийн ах­лагч Х.Цэнд-Аюуш цахим хуудсандаа “Энэхүү бэлт­гэлийн байрыг хөл бөмбөгийн шигшээ багийн бэлтгэлийн бааз нэртэйгээр анх байгуулсан. Харин одоо бол гоё амралтын газар болжээ. Шиг­шээ багийнхан тэмцээнд оролцох гээд энэ­хүү бэлтгэлийн төвд байрлах гэтэл мөнгө нэх­сэн. Хөл бөмбөгийн холбооноос мөнгө төлөхгүй гэсэн тул тамирчид хүйтэнд, гадаа цасан дээр бэлтгэлээ хийцгээсэн” гэж бичсэн байв. Уг бэлт­гэлийн байрыг “FIFA forward” төслийн хү­рээнд 2021 ашиглалтад оруулсан гэнэ. Ази­даа анхдагч хэмээн нэрлэж буй, агаараар хий­лэгддэг би­түү дээвэртэй энэхүү спорт байгууламжийн урт 120, өргөн 80, өндөр 27.5 метр бөгөөд 250 үзэгчийн суудалтай аж. Ezaal.mn сайтад оруул­сан мэдээллээр бол тус заалыг цагийн 200 000 төг­рөгөөр түрээсэлдэг юм байна. 
Уг нь шигшээ багийн тамирчид байрлах үед амралтын газартаа зочид хүлээж авахгүй хэ­мээн нээлтийнх нь үеэр онцолж байжээ. “Одоо бол тусдаа гарсан ашгийн байгууллага, ам­ралт, цэнгээний газар л болсон. Шигшээ ба­гийнхан байрлаж байхад согтуу хүмүүс ирээд “Өрөө байна уу” гэх нь ч бий” гэж ярих нэгэн ч байсан юм. Энэ талаар тус төвийн мене­жер М.Мөнхтуяагаас тодруулахад “Үйл ажил­ла­гааныхаа зардлыг манайх өөрсдөө бүрэн ха­риуц­даг. Хөл бөмбөгийн холбоо болон бэлт­­­гэлийн төв байр нь гэрээнийхээ дагуу ажил­­­ладаг. Өөрөөр хэлбэл, бэлтгэлийн төв бай­ранд байрлаж буй тамирчдын төлбөрийг Хөл бөмбөгийн холбооныхон хариуцдаг. Ма­най бай­гууллага нэг ээлждээ 70 хүртэлх хүн хү­лээн авах хүчин чадалтай. Шигшээ багийн 10 тамирчин тав хоног байрлалаа гэхэд дасгал­жуу­лагч нартай ярилцаж байгаад гаднаас ам­рагч авах, эсэхээ шийддэг. Шигшээ багийн та­мир­чид байрлаж буй үед ихэнхдээ амрагч хүлээж авдаггүй” гэсэн юм.

А.Үүл