Архангай аймагт урьдчилан сэргийлэх хяналт шалгалтаар 226 тарвага хураан авчээ. Тодруулбал, эрүүл мэндийн сайдын 2020 оны 24 дүгээр албан даалгавар, аймгийн Засаг даргын зургадугаар албан даалгаврыг хэрэгжүүлэх ажлын хүрээнд өнгөрөгч 8 дугаар сарын 5-наас эхлэн аймгийн Цагдаагийн газар, Онцгой байдлын газар, Мэргэжлийн хяналтын газар, Байгаль орчин аялал жуулчлалын газар, Зоонозын өвчин судлалын төвийн мэргэжилтнүүд хамтран хөдөлгөөнт эргүүл шалгалтыг зохион байгуулан ажиллаж байна.
Хяналт шалгалтаар энэ хугацаанд Увс, Завхан аймгийн нийтийн тээврийн автобус, Тариат, Хангай, Цахир, Эрдэнэбулган, Цэцэрлэг сумын 23 холбогдогчоос 226 тарвага, түүний бүтээгдэхүүнийг хураан авч, шинжлэн халдвар хамгаалал био аюулгүй ажиллагааны зааврыг баримтлан тусгай зориулалтын нүхэнд халдваргүйтгэн устгав. Нийт дал гаруй сая төгрөгийн торгууль, нөхөн төлбөр оногдуулсан байна.
