Тээврийн хэрэгслийн улсын дугаарын дээд хязгаарыг өөрчлөх шаардлагатай гэв

Улаанбаатар хотын түгжрэлийг бууруулах зорилгоор өнгөрсөн оны хоёрдугаар сарын 8-нд нийслэлийн ИТХ-аар “Нийслэл хотод олгох тээв­рийн хэрэгслийн улсын бүртгэлийн дугаа­рын дээд хязгаарыг тогтоох тухай” тогтоолыг батал­сан. Үүний хүрээнд нийслэл хотод олгох тээврийн хэрэгслийн улсын бүртгэлийн дугаарын дээд хязгаарыг 730 000 байхаар тог­тоосон юм. Үүнээс хойш нэг жилийн хугацаа өнгөр­сөн ч авто тээврийн хэрэгслийн тоо буурах  нь бүү хэл, 804 000 болж нэмэгджээ. Энэ талаар нийслэлийн Авто тээврийн хэрэгслийн бүрт­гэл, хяналтын төвийн дарга Э.Ниндэвээс тодруулахад “Тээврийн хэрэгсэлд дугаар шинээр олгох үйл ажиллагааг өнгөрсөн арваннэгдүгээр сарын 8-наас зогсоосон.  Тээврийн хэрэгслийн өмчлөгч, эзэмшигч нь нийслэлийн оршин суугч, Улаанбаатарт бүртгэлтэй, тээврийн хэрэгслийн хөдөлгүүрийн экологийн ангилал нь “евро-4”, эсвэл түүнтэй дүйцэхүйц буюу түүнээс дээш,  сүүлийн 10 жилийн дотор үйлдвэрлэгдсэн байх гэх мэт шалгуурыг хангасан иргэдэд улсын дугаар олгохоор зохицуулсан. Одоогоор 1500 иргэн шинээр улсын дугаар авах хүсэлтээ ца­химаар бүртгүүлсэн байна. Гэвч шинээр авто ма­шины дугаар огт олгоогүй. Ашиглалтын шаард­лага хангахгүй тээврийн хэрэгслүүдийг бүрт­гэлээс хассанаар дараагийн хүнд боломж нээг­дэх юм. Гэхдээ авто машины тоо тогтоосон дээд хязгаараас давсан. Тиймээс дээд хязгаар тог­тоосон тоо, аргач­лалыг өөрчлөх шаардлага үүсээд байна” гэв. 
Автомашины дугаар шинээр олгохгүй бай­гаатай холбоо­тойгоор хуучин дугаарын үнэ тэн­гэрт хандаж, энэ төрлийн наймаа цэцэглэж буй. Өөрөөр хэлбэл, цахим орчинд тээврийн хэ­рэгс­лийн улсын дугаарыг 1-2 сая төгрөгөөр ху­далдаж авна, зарна гэсэн зар хаа сайгүй. Бүр за­рим томоохон компани олноор нь худал­даж аваад “дардаг” бололтой. Тухайлбал, “Таван­богд” группийнхэн “Улаанбаатар хотын ул­сын ду­гаарыг 1.2-1.3 сая төг­рөгөөр байнга худал­даж авна, дугаарлалт болон тоо ширхэг хамаа­рах­гүй” хэмээн цахимд байршуулжээ. Авто­машин ху­далдаж авахад улсын дугаартай, дугаар­­гүй­гээс нь шалтгаалан үнэ хаялцах болж. Хо­тын дар­­га ченжүүдийг дэмжиж, автомашины ду­гаа­рыг та­раа­гаад өгчихсөн юм биш үү гэх хардлага ир­­гэдийн дунд байна.

Ч.Болор