Эрчим хүчний дэд сайд М.Баярмагнай STUDENT DAY 2024 арга хэмжээний хүрээнд ШУТИС-ийн Эрчим хүчний сургуулийн оюутан залуустай уулзаж, салбарын өнөөгийн байдлын талаар танилцуулга хийлээ. Чадлын дутагдалд орсон энэ үед цаашид хийгдэх томоохон төсөл хөтөлбөрүүдийн хэрэгжилт, эдийн засгийн нөхцөл байдал, салбарын боловсон хүчний талаар авч хэрэгжүүлж буй бодлого болон түүнд шинээр төгссөн оюутнуудыг хэрхэн уялдуулж байгаа талаар оюутнууд ихэд сонирхсон байна.
Монгол Улсын Засгийн газраас хэрэгжүүлж буй Шинэ сэргэлтийн бодлого болон “Алсын хараа 2050” урт хугацааны хөтөлбөрт багтсан Эрчим хүчний салбарын богино, дунд болон урт хугацаанд хэрэгжүүлж буй төсөл хөтөлбөрүүдийн талаар дэлгэрэнгүй танилцуулсан. Тухайлбал, Эрдэнэбүрэнгийн усан цахилгаан станц /усан цэнэгт цахилгаан станцын ач холбогдол/, Тавантолгойн дулааны цахилгаан станц, шинэ технологи бүхий Сэргээгдэх эрчим хүчний төсөл хөтөлбөрүүд, эх үүсвэрүүдэд хийгдэж байгаа өргөтгөл, шинэчлэлийн талаар дэлгэрэнгүй мэдээллийг салбарын дэд сайд өгсөн.
Мөн Эдийн засаг, дэд бүтцийн хөгжлийн суурь болсон эрчим хүчний салбарт 16 мянга гаруй инженер техникийн ажилчин, албан хаагч ажиллаж байгааг дурдаад цаашид боловсон хүчний хэрэгцээ нэмэгдэж байгаа талаар статистик танилцуулжээ. Оюутан залуусын авах зарим гол үйлчилгээ /E-Mongolia системд E-Student цэс нэмэгдсэн, нийтийн тээврээр зорчих картын үйлчилгээ гэх мэт/-г цахимжуулах, эрүүл мэндийн эрт илрүүлгийг даатгал төлсөн эсэхээс үл хамааран хамруулах, боловсролын зээлд хамрагдах оюутнуудын тоог нэмэгдүүлэх, сайн дурын ажил хийсэн оюутнуудад зохих кредит цагийг өгөх, оюутан цэрэг хөтөлбөрт хандагчдын тоо эрс нэмэгдүүлэх зэрэг олон давуу тал гарсан гэдгийг онцлов.
