Монгол Улсын баатар, хурандаа генерал Б.Цогийн нэрэмжит Цэргийн гавяаны одонт Зэвсэгт хүчний 120 дугаар ангид 2023 оны II ээлжээр хугацаат цэргийн албанд татагдан ирсэн шинэ дайчид золбоо хиймортой, цог жавхаалаг байна. Шинэ дайчдад мэргэжил олгох шатны сургалт хөтөлбөр төлөвлөгөөний дагуу арваннэгдүгээр сарын 06-ны өдөр 10 км-ийн явган маршаар үргэлжилж, анхны буудлагын дасгалыг гүйцэтгүүллээ.
Дайчид цаг агаарын хүнд ширүүн нөхцөлд үүрэг гүйцэтгэсэн нь тэсвэр хатуужлыг нь нэмэгдүүлж, эр зоригыг нь бататгав.
Мөн арваннэгдүгээр сарын 03, 04-ний өдрүүдэд Зэвсэгт хүчинд Артиллерийн цэрэг үүсэн байгуулагдсаны 102 жилийн ойг угтан Зэвсэгт хүчний 120 дугаар ангийн байрлалд артиллерчин дайчид хурд хүч, авхаалж самбаагаа уралдуулан спортын 6 төрлөөр өрсөлдсөн юм. Биллъярдийн төрөлд тэргүүн байрт Монголын Артиллерийн цэргийн холбооны баг тамирчид, дэд байрт Зэвсэгт хүчний 016 дугаар нэгтгэлийн баг тамирчид, гутгаар байрт артиллерчин ахмад дайчид шалгарав. Дартсын төрөлд Зэвсэгт хүчний 016 дугаар нэгтгэлийн баг тамирчид тэргүүлж, дэд байрт 2001 оны төгсөгчид, гутгаар байрт ҮБХИС-ийн баг тамирчид шалгарч, шатраар мөн ҮБХИС, ЗХЖШ, Зэвсэгт хүчний 120 дугаар ангийнхан шагналын эзэд болсон юм.
Харин теннисийн төрөлд Монголын Артиллерийн цэргийн холбооны баг тамирчид манлайлж, Зэвсэгт хүчний 120 дугаар анги болон ҮБХИС-ийн баг тамирчид удаалсан бол сагсан бөмбөгийн төрөлд тэргүүн байрт Зэвсэгт хүчний 120 дугаар анги, дэд байрт Зэвсэгт хүчний 016 дугаар нэгтгэл, гутгаар байрт 2001 оны төгсөгчид орлоо. Гар бөмбөгийн төрөлд ҮБХИС-ийн баг тамирчид тэргүүлж, Зэвсэгт хүчний 120 дугаар анги болон Монголын Артиллерийн цэргийн холбооны баг тамирчид тус тус удаалав.
Цогцолбор тэмцээний нэгдсэн дүнгээр ҮБХИС-ийн баг тамирчид тэргүүлж, дэд байрт Зэвсэгт хүчний 120 дугаар ангийн баг тамирчид, гутгаар байрт Зэвсэгт хүчний 016 дугаар нэгтгэлийн баг тамирчид шалгарав.
Хошууч Т.МЯГМАРСҮРЭН
