Нийслэлд өчигдөр цас орж, хотын удирдлагуудын өвлийн бэлтгэлийг шалгалаа. Уламжлал ёсоор цас орсноос шалтгаалан замын түгжрэл ихсэж, зарим газарт хөдлөхгүйгээр нэг цаг орчим зогссон тохиолдол гарсныг ч иргэд хэлж, бухимдаж байв. Нийслэлийн удирдах ажилтнуудын шуурхай зөвлөгөөн өчигдөр болж, өвлийн бэлтгэл, ялангуяа халтиргаа гулгаанаас сэргийлэх талаар хэлэлцсэн юм. Халтиргаанаас сэргийлэхийн тулд одоогоор давс 4145, бодис 2759 тонныг нөөцөлсөн аж. Үүн дээр нэмж давс 1359, бодис4499 тонныг худалдаж авах шаардлагатай гэнэ. Зам, талбайн цэвэрлэгээний 24 байгууллагын 846 үйлчлэгч, тусгай зориулалтын 312 машинтайгаар өчигдрийн цаснаар ажилласан гэв. “Хот тохижилтын газар” ОНӨААТҮГ-ын дарга Б.Мөнхцэцэг үүний талаар “Бодис цацагч 12 машин байгаагаас хоёр нь эвдэрсэн. Мөн хоёрынх нь тэвшийг солиогүй. 07.40 цагаас (өчигдөр) эхний машин гарч, 10.00 цагийн байдлаар 12 тонн давс цацсан” гэв. Түүнчлэн иргэдийг машиныхаа дугуйг өвлийнхөөр солихыг уриалж, скүүтер, дугуйн хэрэглээг хязгаарлах шаардлагатайг онцоллоо.
Энэ үеэр дүүргийн удирдлагууд нөхцөл байдлын талаар мэдээлэл өгөв. Сонгинохайрхан дүүргийн хувьд зам, талбайн цэвэрлэгээний дөрвөн аж ахуйн нэгж үйл ажиллагаа явуулдаг бөгөөд 200 тонн давс нөөцөлжээ. Баянзүрх дүүргийн тухайд техник хэрэгсэл дутагдалтай гэнэ. Сүхбаатар дүүргийн хэмжээнд орон нутгийн өмчит хоёр, хувийн хэвшлийн нэг байгууллага үйл ажиллагаа явуулж буй бөгөөд давс цацагч нэг машин шинээр авч байгаа аж. Ингэснээр техникийн хүчин чадал сайжрах юм байна. Баянгол дүүрэгт 80 тонн бодис, давс цацагч хоёр машин бий гэнэ.
Орон нутгийн тухайд энэ сарын 29-нөөс эхлэн баруун, төвийн бүсийн аймгуудаар цас оржээ. Цаг уур, орчны шинжилгээний газраас мэдээлснээр өчигдөр Завхан, Хөвсгөл, Баянхонгор, Архангай, Сүхбаатар, Төв аймагт цас үргэлжлэн орж байлаа. Одоогоор Баян-Өлгийн Булган сум, Завхан аймгийн Тэлмэнд долоон см-ийн зузаан цасан бүрхүүл тогтсон нь дээд үзүүлэлтэд тооцогдож байгаа аж. Тэр дундаа Завхан аймгийн ихэнх сумд цас орсноор улсын чанартай зарим авто зам болон Загастай, Ганц, Солонготын даваанд халтиргаа гулгаа үүсжээ. Тиймээс иргэд орон нутгийн замд зорчихдоо тээврийн хэрэгслийнхээ бүрэн бүтэн байдлыг хангаж, болгоомжтой зорчихыг онцгой байдлын байгууллагаас анхаарууллаа. Эдгээрээс бусад аймгаар цаг агаар тогтуун, авто замын хөдөлгөөн хэвийн үргэлжилж байгаа аж. Нийслэлд өнөөдөр ч цас үргэлжлэн орох төлөвтэй байна.
Бэлтгэсэн: М.Оч
