Төрийн өмчийн ерөнхий боловсролын сургуулийн нэгдүгээр ангийн элсэлтийн цахим бүртгэл 2023 оны наймдугаар сарын 15-ны өдрийн 09:00 цагаас наймдугаар сарын 25-ны 17:00 цаг хүртэл хийгдэнэ. Нийт бүртгэл хамрагдах боломжтой 64,257 хүүхдээс 27,114 хүүхэд бүртгэлээ баталгаажуулсан байна. Тиймээс дээрх хугацааны дотор e-mongolia систем рүүгээ орж бүртгэлээ баталгаажуулаарай. Бүртгэл баталгаажуулахад ТҮР ТҮДГЭЛЗҮҮЛСЭН, БҮРТГЭХЭЭС ТАТГАЛЗСАН гэсэн төлөвүүд байвал тухайн сургуулийн элсэлтийн комисст хандах юм байна. ХАМРАН СУРГАХ ТОЙРОГ ТОДОРХОЙГҮЙ гэсэн төлөв байвал шилжилт хөдөлгөөн хийсний улмаас сургууль тодорхойгүй байгаа тул шилжилт хөдөлгөөн хийснээс 24 цагийн дараа дахин орж шалгана. ХЯНАГДАЖ БАЙГАА гэсэн төлөвтэй бол таны хүүхдийн мэдээллийг элсэгчээр бүртгэх эсэх шийдвэр дээр ажиллаж байна.
